लाहोर कलन्दर्सबाट राशिद खानको स्थानमा सन्दिपले पिएसएल खेल्ने


क्रिकेट

काठमाडौं : सन्दीप लामिछाने पाकिस्तान सुपर लिग (पिएसएल) खेल्न शनिबार पाकिस्तान प्रस्तान गरेका छन्। नेपाली राष्ट्रिय क्रिकेट टोलीका लेग स्पिनर सन्दीप लाहोर कलन्दर्सबाट प्रतियोगिताको बाँकी खेल खेल्न जान लागेका हुन्।

शुक्रबार साँझ सन्दीपको सम्झौता पक्का भएपछि आज दोहाहुँदै कराची जान लागेको सन्दीपको व्यवस्थापन सम्हाल्दै आएका रमण शिवाकोटीले जानकारी दिए। लाहोरका स्पिनर राशिद खान अन्तर्राष्ट्रिय ड्युटीमा अफगानिस्तान जानु परेपछि लाहोरले सन्दीपलाई बोलाएको हो।

यसअघि पिएसएल ड्राफ्टमा सर्वाधिक महँगो प्लाटिनम क्याटगोरीमा रहेका सन्दीप अनसोल्ड भएका थिए। लाहोर कलन्दर्सले जारी प्रतियोगितामा ३ खेल खेल्दै २ जित र १ हारको नतिजासहित अंक तालिकामा तेस्रो स्थानमा छ। लाहोरले आइतबार कराची किंग्ससँग आफ्नो चौथो खेल खेल्दैछ।

यसअघि सन् २०१९ मा पनि सन्दीपले लाहोरबाट पीएसएल खेलेका थिए। त्यसबेला लाहोर अंक तालिकाको पुछारमाथियो । त्यतिबेला ७ खेल खेलेका सन्दीपले ११ विकेट लिएका थिए। सिजन २०२१ का लागि भएको ड्राफ्टमा नेपाली क्रिकेटरलाई आबद्ध गर्न कुनै पनि टिमले इच्छा देखाएका थिएनन्।

ड्राफ्टमा नेपालबाट सन्दीप लामिछानेसहित १० क्रिकेटर परेका थिए। नेपालका सहित विश्वभरका ४ सय बढी खेलाडीले ड्राफ्टमा नाम लेखाएका थिए। सन्दीप लामिछाने पिएसएलको सर्वाधिक महँगो श्रेणी प्लाटिनममा समावेश भएका थिए। अन्य ९ क्रिकेटर सिल्भर श्रेणी-विदेशीमा थिए।

कप्तान ज्ञानेन्द्र मल्ल, उपकप्तान दीपेन्द्रसिंह ऐरी, पूर्वकप्तान पारस खड्कासहित आसिफ शेख, अभिनास बोहरा, करण केसी, कुशल मल्ल, पवन सर्राफ र सुवास खकुरेल ड्राफ्टमा परेका थिए।