किङ रोनाल्डोले बनाए दुर्लभ किर्तिमान, मेसि आसपास छैनन्


समाचार

एजेन्सी । इटालीयन फुटबल क्लब युभेन्टसका पोर्चुगिज खेलाडी क्रिश्चियानो रोनाल्डोले क्लब फुटबलमा नयाँ किर्तीमान राखेका छन् । उनले युरोपका शिर्ष ५ लिगमा लगातार १२ सिजनसम्म कम्तिमा २० गोल गर्ने किर्तीमान बनाएका हुन् ।

इटालीयन सिरी ए अन्तर्गगत गएराति स्पेजिया विरुद्धको खेल युभेन्टसले ३–० ले जित्यो । उसका लागि रोनाल्डोसँगै अल्भारो मोराटा र फेडेरिको चिएसाले एक एक गोल गरे । यो खेलमा गोल गरेका रोनाल्डोले जारी सिजनमा २० गोल पूरा गरे ।

क्लब फुटबलमा लगातार १२ सिजनसम्म कम्तिमा २० गोल गर्ने रोनाल्डो पहिलो खेलाडी हुन् । उनले अहिलेसम्म क्लब करियरमा ६ सय लिग खेल खेलेका छन् । जारी सिजनको सिरी ए मा युभेन्टस २४ खेलबाट ४९ अंकसहित तेस्रो स्थानमा रहेको छ । शिर्ष स्थानको इन्टर मिलानको ५६ अंक छ भने ५२ अंकसहित एसि मिलान दोस्रो स्थानमा रहेको छ ।

दशरथ रंगशालामा हुने नेपाल र अस्ट्रेलियाबीचको खेल अन्योलमा

विश्वकप छनोटअन्तर्गतको दशरथ रंगशालामा हुने भनिएको नेपाल र अस्ट्रेलियाबीचको खेल अन्योलमा परेको छ। नेपाल र अस्ट्रेलियाबीचको विश्वकप छनोटको खेल मार्च ३० का लागि तय थियो। कोरोनाका कारण एएफसीले विश्वकप छनोटका खेलहरू एउटै भेन्यूमा गर्ने तयारी गरेकाले दशरथ रंगशालामा हुने नेपाल र अस्ट्रेलियाबीचको खेल अनिश्चित बनेको हो।

कोभिड–१९का कारण यात्राको प्रतिबन्ध र क्वारेन्टिनको नियमका कारण एएफसीले मार्च ३०का लागि तय भएको तालिका परिमार्जन गरेको छ । एएफसीले मंगलबार विश्वकप छनोटको तालिका परिमार्जन गरेको छ। नयाँ तालिकाअनुसार मार्चमा विश्वकप छनोटका ३ खेल मात्र हुने छ। परिर्माजित तालिकामा नेपाल र अस्ट्रेलियाबीचको खेलका विषयमा केही उल्लेख छैन ।

एक समूहका खेल एउटै देशमा गर्ने एएफसीको योजना छ। नेपाल रहेको समूह बीका बाँकी खेल आयोजनाका अस्ट्रेलिया, जोर्डन र नेपालले दाबी प्रस्तुत गरेको बताइएको छ। पूर्वाधार र सुरक्षाका कारणले नेपालले समूह सबै खेल आयोजनाको जिम्मा पाउने सम्भावना कम छ। आयोजनाको दाबी गरेका तीनै देशमा खेल नुहने अवस्था आए न्यूट्रल भेन्यूमा खेल हुनेछ।

एएफसीले विश्वकप र एसियाकपको छनोट चरणका बाँकी खेलहरु आयोजना गर्न विभिन्न समूहमा रहेका आफ्ना सदस्यहरुलाई आवेदन दर्ता गर्न भनेको छ । ‘सेन्ट्रल भेन्यु’मा आयोजना गर्ने छनोट चरणका खेलहरु २०२१ मे ३१ देखि जुन १५ सम्म गरिने एएफसीले जनाएको छ।