किङ रोनाल्डो सर्वाधिक गोल गर्ने खेलाडी, आफ्नो रेकर्ड तोडेपछि पेलेले दिए बधाई


समाचार

काठमाडौं । औपचारिक खेलमा सबैभन्दा बढी गोल गरेको आफ्नो कीर्तिमान उछिनेकोमा पेलेले सोमबार क्रिस्टियानो रोनाल्डोलाई बधाई दिएका छन् । रोनाल्डोको ह्याट्रिकमा इटालीको सिरी ‘ए’ मा युभेन्टसले कागलिरीलाई ३–१ ले हराएको हो । युभेन्टसका लागि आइतबार रोनाल्डोले गरेको सो गोल सँगै उनले खेल जीवनमा ७७० गोल गरेका छन् । उनले यसअघि पेलेले राखेको ७ सय ६७ गोलको रेकर्डलाई समेत तोडेका छन् ।

यसअघि यो कीर्तिमान पेलेको नाममा थियो । रोनाल्डोले इटालियन सिरी ए फुटबल अन्तर्गत गएराति काग्लिएरीसँग भएको खेलको सुरुको ३२ मिनेट भित्र तीन गोल गरे । उनले आफ्नो खेल जीवनमा ७७० गोल गरेका छन् । यो पेलेले खेल जीवनमा गरेको भन्दा तीन गोल बढी हो । उनले आफ्नो खेल जीवनमा ७६७ गोल गरेका थिए । केही प्रतिवेदनहरुमा यसलाई विश्व कीर्तिमान पनि भनिएको छ ।

तर चेक फुटबल एसोसिएसनले भने सर्वाधिक गोलकर्ताको कीर्तिमान अस्ट्रिया र चेकोस्लोभाकियाका पूर्व स्ट्राइकर जोसेफ बिकानको नाममा रहेको दाबी गर्दै आएको छ । बिकानले ८२१ गोल गरेको दाबी चेक फुटबल एसोसिएसनको छ ।

तर रेकस्पोर्ट स्कोरको तथ्यांकमा भने बिकानले खेल जीवनमा ८०५ गोल गरेको उल्लेख छ । तर उनले गरेका २७ गोल औपचारिक अन्तर्राष्ट्रिय खेलमा गरेका गोल भने होइनन् । यसले गर्दा उनको औपचारिक गोल संख्या ७५९ हुन आउँछ ।

रोनाल्डोलाई बधाई दिदै पेलेले आफ्नो इन्स्टाग्राममा लेखेका छन् ”जीवन एक उडान हो। प्रत्येकले आफ्नो सुन्दर यात्रा बनाउनका लागि बाटो तय गर्छन् । म तपाईंलाई धेरै प्रशंसा गर्छु, मलाई तपाईको खेल हेर्न मन पर्छ र यो कसैको लागि लुकाराख्नु जरुरी छैन । मेरा आधिकारिक गोलहरूको रेकर्ड तोडेकोमा बधाई भन्न चाहन्छु ।”