किङ मेस्सीको उत्कृष्ट प्रदर्शनमा बार्सिलोनाको शानदार जित


Featured, खेलकुद

काठमाडौँ- स्पेनिस ला लिगा फुटबल अन्तर्गत सोमबार राति भएको खेलमा बार्सिलोना विजयी भएको छ । घरेलु मैदानमा भएको खेलमा लियोनल मेस्सीसहितको बार्सिलोनाले हुएस्कालाई ४–१ ले पराजित गरेर पुनः दोस्रो स्थानमा उक्लिएको हो ।

अंक तालिकाको पुच्छारमा रहेको हुएस्कामाथि क्याम्प नाउमा बार्सिलोना पूर्ण रुपमा हावी भयो । खेलको १३औँ मिनेटमा मेसीको गोलबाटै बार्सिलोनाले खेलमा अग्रता बनाएको थियो । फ्रान्सेली स्ट्राइकल एन्टोनी ग्रिजम्यानले ३५ औँ मिनेटमा अर्काे गोल गरे ।

पहिलो हाफको एन्जुरी समयमा हुएस्काले पेनाल्टीको अवसर पायो । राफा मिरले हुएस्काका लागि पेनाल्टीमार्फत गोल गरे । दोस्रो हाफको ५३ औँ मिनेटमा बार्सिलोनाका डिफेन्डर ओस्कार मिङगुएजाले गोल गर्दा बार्सिलोना सहज जित तर्फ अघि बढिसकेको थियो । ९० मिनेटमा मेसीले व्यक्तिगत दोस्रो र टोलीका लागि चौथो गोल गरेपछि बार्सिलोना सानदार जित हात पार्न सफल भयो ।

जितपछि बार्सिलोना २७ खेलबाट ५९ अंक बनाउँदै दोस्रो स्थानमा उक्लिएको छ । शीर्ष स्थानमा रहेको एट्लेटिको मड्रिडमाथि बार्सिलोना दवाव बनाउन सफल भएको छ । एट्लेटिको मड्रिडको २७ खेलबाट ६३ अंक छ । समान खेल खेल्दा ५७ अंक रहेको साविक विजेता रियल मड्रिड तेस्रो स्थानमा छ ।

मेस्सीले बार्सिलोनाबाट ७६७ औँ खेलमा सहभागिता जनाएका हुन् । योसँगै उनले बार्सिलोनाबाट सर्वाधिक खेलमा सहभागिता जनाउने जाभीको कीर्तिमानमा बराबरी गरेका छन् ।