मेस्सी र रोनाल्डोले विश्वकप खेल्न नपाउने ! यस्तो छ कारण


खेलकुद

एजेन्सी : क्रिस्टियानो रोनाल्डो र लियोनेल मेस्सीले फुटबल विश्वकप गुमाउने सम्भावना बढेको छ। पछिल्लो समय घोषणा भएको युरोपेली सुपर लिगका कारण रोनाल्डो र मेस्सीले विश्वकप गुमाउने सम्भावना बढेको हो। सोमबार मात्रै एसी मिलान, आर्सनल, एथलेटिको म्याड्रिड, चेल्सी, बार्सिलोना, इन्टर मिलान, युभेन्टस, लिभरपुल, म्यानचेस्टर सिटी, म्यानचेस्टर युनाइटेड, रियल म्याड्रिड र टोटनह्याम हट्सपर गरी १२ संस्थापक क्लबले युरोपेली सुपर लिगको घोषणा गरेका थिए।

युरोपेली सुपर लिगका कारण फुटबल जगतमा ठूलो तरंग पैदा भएको छ। युरोपका मात्र नभई विश्वकै ठूला रहेका १२ कल्बहरु मिलेर गरेको सुपर लिगको घोषणाको अधिकांश स्थानमा आलोचना भइरहेको छ। सुपर लिगलाई युरोपेली फुटबलको सर्वोच्च संस्था यूईएफएले स्वार्थप्रेरित र अपमानजनक कदमको रुपमा लिएको छ। १२ क्लबले फुटबल समर्थकको मुखमा थुकेको भन्दै यूईएफएले कडा कदम चाल्ने तयारी गारेको छ।

विश्व फुटबलकै सर्वोच्च संस्था फिफा र यूईएफएसँग छलफल नगरी एकलौटी ढंगमा १२ क्लब मिलेर चालेको यस कदमले युरोपेली मात्र नभई विश्व फुटबलमा छुट्टै असर पार्ने देखिन्छ। सुपर लिगमा सहभागी हुने खेलाडीलाई यूईएफएले आयोजना गर्ने कुनैपनि प्रतियोगिता खेल्न नदिने तयारी यूईएफएको छ।

त्यस्तै फिफाले पनि सुपर लिगमा सहभागी हुने खेलाडीलाई अन्तराष्ट्रिय फुटबलमा प्रतिवन्ध लगाउने कुरा चलिरहेको छ। यदि यस्तो भएको खण्डमा सुपर लिगमा सहभागी हुने खेलाडीहरुले विश्वकप फुटबल, अन्तराष्ट्रिय फुटबल र क्षेत्रिय फुटबलहरुमा सहभागी हुन पाउने छैनन्।

हाल मेस्सी बार्सिलोना र रोनाल्डो युभेन्टसमा छन्। दुवैका क्लब युरोपेली सुपर लिगका संस्थापक क्लबको रुपमा छन्। यदि फिफा र यूईएफएले ती क्लब र तिनका खेलाडीहरु माथि प्रतिवन्ध लगाएको खण्डमा आउने विश्वकपमा मेस्सी र रोनाल्डो हुने छैनन्।