खुसिको खबर ! एक खेल अगावै त्रिकोणात्मक सिरिजको फाइनलमा पुग्यो नेपाल


क्रिकेट

काठमाडौं, वैशाख ८ : राजधानीमा जारी त्रिकोणात्मक टी-२० क्रिकेटमा एक खेल अगावै नेपाल फाइनल प्रवेश गरेको छ । आज नेदरल्याण्ड्स र मेलेसियाबीचको खेल बराबरी भएपछि नेपाल एक खेल अगावै फाइनल प्रवेश गरेको छ । नेपालसँगै नेदरल्याण्ड्स पनि फाइनल पुगेको छ । मलेसिया भने प्रतियोगिताबाट बाहिरिएको छ ।

वर्षाले प्रभावित भएको खेलमा नेदरल्यान्ड्सले पहिलो ब्याटिङ गर्दै निर्धारित १३ ओभरमा ४ विकेटको क्षतिमा १०७ रन जोडेको थियो। त्यसपछि मलेसियाले १० ओभरमा ९२ रनको लक्ष्य पाएको थियो। मलेसियाले १० ओभरमा ४ विकेटको क्षतिमा ९१ रन जोडेपछि डिएल मेथडको आधारमा स्कोर बराबरी भयो।

मलेसियालाई अन्तिम ओभरमा जितका लागि ७ रन चाहिएको थियो। जसमा नेदरल्यान्ड्सका भिभियन किग्माले ६ रन मात्र खर्चिए। स्कोर बराबरी भएसँगै नेपाल र नेदरल्यान्ड्स फाइनलमा पुगेका छन्। समूह चरणका सबै चार खेल खेलको नेदरल्यान्ड्सको ५ अंक भएको छ भने अन्तिम खेलअघि नेपालको ४ अंक छ। मलेसियाले १ अंक मात्र जोडेको छ।

अब उपाधिका लागि नेपाल र नेदरल्यान्ड्सबीच आगामी शनिबार प्रतिस्पर्धा हुनेछ। त्यसअघि लिग चरणको अन्तिम खेलमा भोलि बिहीबार नेपाल र मलेसियाबीच प्रतिस्पर्धा हुनेछ। फाइनल पुग्ने दुई टिमको टुंगो लागिसकेको अवस्थामा यो खेल प्रतिष्ठाको लडाइँ हुनेछ।