जिताउन नसकेको भन्दै किङ रोनाल्डोलाई टिमबाट निकाल्न उनकै फ्यानको माग, रोनाल्डोको भबिष्य नै संकटमा


खेलकुद

काठमाडौं, बैशाख २८ : आइतबार युभेन्टस् इटालियन सिरिजमा एसी मिलानसँग ३–० ले पराजित भयो । र, यस खेलसँगै रोनाल्डो पनि आलोचनाको शिकार भएका छन् । पछिल्ला ९ सिजन सिरिए उपाधि जितेको युभेन्टस् यस सिजन च्याम्पियन्स लिगमा छनोट हुने समेत टुंगो छैन र मिलानविरुद्धको खेल हेर्दा यो टोली शीर्ष चारमा पर्न सक्षम छ भन्ने पनि देखिएन ।

‘न सामर्थ्य, न खेल, न पहिचान,’ इटलीको स्थानीय पत्रिका ला गाजेट्टा डेल्लो स्पोर्टस्ले खेलपछि लेखेको छ । यस पत्रिकाले रोनाल्डोको पनि आलोचना गरेको छ । रोनाल्डोले मिलानविरुद्धको खेल पहिलो हाफमा विपक्षीको डिबक्सभित्र एकपटक पनि बल छुन सकेनन् ।

कुनै सट निशानामा लागेन

दोस्रो हाफमा रोनाल्डोले बल्लतल्ल दुई सट प्रहार गरे । तर कुनै पनि टार्गेटमा थिएनन् । ‘अल्भारो मोटारा आफुसँगै भएपनि उनी स्पेस खोज्दै वरपर भौतारिए,’ डेल्लो स्पोर्टस्ले थपेको छ ।

अनिश्चित भविष्य

रोनाल्डोको भविष्य अनिश्चित छ । उनीबारे पछिल्ला समय निकै टिकाटिप्पणी भइरहेको छ । जुन २०२२ सम्म युभेन्टस्सँग उनको सम्झौता छ । यद्यपी उनले क्लब छाड्नसक्ने चर्चा चलिरहेको छ । उनी म्यानचेस्टर युनाइटेड फर्कने हल्ला पनि छ ।

रोनाल्डोका एजेन्ट जर्ज मेन्डिसले यसअघि म्यानचेस्टर युनाइटेडका प्रतिनिधिसँग भेटघाट गरेका थिए । त्यस्तै, रोनाल्डोले स्पोर्टिङ सिपी फर्किएर आफ्नो करियर टुंग्याउन सक्ने पनि चर्चा छ । रोनाल्डोले यही क्लबबाट आफ्नो व्यवसाहिक करियर सुरु गरेका थिए ।

मिलान ‘इटालियन सिरी ए’ को तेस्रो स्थानमा

इटालियन सिरी ए फुटबलमा एसी मिलानले सहज जित निकालेको छ । आइतबार राति युभेन्ट्सको मैदानमा भएको खेलमा मिलानले युभेन्ट्सलाई ३–० गोल अन्तरले पराजित गरेको हो ।

मिलानलाई जित दिलाउन ब्राहिम डियाज, एन्ट रेबिक र फिकायो टोमोरीले एक÷एक गोल गरे । पहिलो हाफको इन्जुरी समयमा डियाजले गोल गर्दै मिलानलाई अग्रता दिलाएका थिए ।

खेलको ७८ औं मिनेटमा रेबिकले गोल गर्दै मिलानलाई २–० को अग्रता दिलाए । त्यसपछि खेलको ८२ औं मिनेटमा टोमोरीले गोल गर्दै मिलानलाई ३–० को जित दिलाए ।

जितसँगै मिलान ३५ खेलमा ७२ अंक जोड्दै लिगको तेस्रो स्थानमा उक्लिएको छ भने ३५ खेलमा ६९ अंक जोड्दै युभेन्ट्स लिगको पाँचौं स्थानमा रहेको छ ।