यसकारण आइपिएलका बाँकी खेलमा इङ्ग्लिस खेलाडी सहभागी नहुने


क्रिकेट

एजेन्सी : बढ्दो कारोना संक्रमणका कारण इन्डियन प्रिमियर लिग (आइपिएल) अनिश्चित कालमा लागि स्थगित भएको छ । महामारीको डर बढ्दै गएको अवस्थामा आइपिएल कहिले हुन्छ भन्ने निश्चित नभए पनि भारतीय क्रिकेट कन्ट्रोल बोर्ड (बिसिसिआई) ले आगामी सेप्टेम्बरमा बाँकी ३१ खेल खेल्ने तयारी थालेको बुुझिएको छ ।

इङ्ग्ल्यान्ड क्रिकेट बोर्डले आइपिएलका बाँकी खेलमा आफ्ना खेलाडी उपस्थित नहुने बताएको छ । इङ्ग्ल्यान्ड क्रिकेट बोर्डका निर्देशक एस्ले जाइल्सले व्यस्त तालिकाका कारण इङ्लिस खेलाडी आइपिएलमा उपलव्ध नहुने बताएका हुन् ।

‘आगामी ३/४ महिना इङ्ग्ल्यान्डले विभिन्न देशसँग सिरिज खेल्ने तालिका रहेकाले खेलाडीलाई नो अब्जेक्सन सर्टिफिकेट (एनओसी) मिल्न निकै कठिन छ’ एल्लेले भने ।

इङग्ल्यान्डले यसबीचमा न्युुजिल्यान्डसँग टेस्ट, श्रीलंकासँग एकदिवसीय, भारतसँग टेस्ट सिरिज, एसेज र टि-२० विश्वकप खेल्ने छ । आइपिएलका विभिन्न फ्रेन्चाइज क्लबमा कुल १२ इङ्ग्लिस खेलाडी सामेल थिए ।