डेब्युमै शानदार प्रदर्शन गर्ने यी चार नेपाली खेलाडीले जनही १/१ लाख पाउने


क्रिकेट

काठमाडाैं- नेपाली राष्ट्रिय क्रिकेट टोलीको मुख्य प्रायोजक माई सेकेन्ड टिचर (एमएसटी)ले यसै महिनाको सुरुवातमा आयोजना भएको त्रिकोणात्मक सिरिजमा डेब्यू गरेका चार खेलाडीलाई चार लाख रुपैयाँ दिने भएको छ। नेपाल, नेदरल्यान्ड्स र मलेसिया सम्मिलित त्रिकोणात्मक सिरिजका क्रममा डेब्यू गर्ने चार खेलाडीलाई उक्त रकम दिइन लागेकाे हाे।

कुशल भुर्तेल, आसिफ शेख, शाहब आलम र कमल सिंह ऐरीलाई जनही नगद एक लाख रुपैयाँ केही दिनमा नै हस्तान्तरण गर्ने माई सेकेन्ड टिचरका संस्थापक सुलभ बुढाथोकीले जानकारी दिए।

यस्तै, त्रिकोणात्मक टि२० सिरिज च्याम्पियन नेपाली टोलीलाई पाँच लाख दिइने उनले बताए। नेपालले त्रिकोणात्मक सिरिजको फाइनलमा नेदरल्याण्ड्सलाई १ सय ४२ रनको फराकिलो अन्तरले हराउँदै उपाधि जितेको थियो। उक्त त्रिकोणात्मक सिरिजमा कुशल, आशिफ, कमल र साहबले डेब्यू गर्दै उच्च प्रदर्शन गरेका थिए।

डेब्यू खेलको सुरुवाती तीनै खेलमा कुशल भुर्तेलले अर्धशतक प्रहार गरेका थिए। उक्त सिरिजमा कुशलले ५ खेलमा ४ अर्धशतक सहित कुल २ सय ७८ रन बनाए। अर्का ओपनर तथा विकेटकिपर शेखले ५ खेलमा एक अर्धशतकसहित १ सय ५४ रन बनाएका थिए। अन्तिम दुई खेल खेलेका कमलले ५ र स्पिनर साहबले ३ खेलमा २ विकेट लिएका थिए।

माई सेकेण्ड टिचरले स्पेन भ्रमणको लागि टोलीको बन्द प्रशिक्षण सुरु भएपछि उक्त रकम खेलाडी र टोलीलाई प्रदान गर्ने जानकारी दिएको छ। माई सेकेण्ड टिचरले उपकप्तान दीपेन्द्रसिंह ऐरी र कुशल भुर्तेलको ब्याटलाई पनि एक वर्षको प्रायोजन गरेको छ।