बलियो पोर्चुगलसामु हंगेरी सधै निरिह, यस्तो छ दुबै टिमबिचको ‘हेड टु हेड’


खेलकुद

काठमाडौं । युरो २०२० मा मंगलबार राति समूह ‘एफ’ अन्तर्गत हुने पहिलो खेलमा साविक विजेता पोर्चुगलले हंगेरीसँग खेल्दै उपाधि रक्षा अभियान सुरु गर्दैछ । हंगेरीको बुडापेस्टस्थित पुस्कस एरिनामा नेपाली समयअनुसार राति ९:४५ बजे सुरु हुने खेलमा दुवै टोली जितका लागि तल्लीन छन् ।

पोर्चुगल र हंगेरीबीच अहिलेसम्म १३ खेल भएका छन्। जसमा पोर्चुगल अपराजित छ। १३ मध्ये पोर्चुगलले ९ जित निकाल्दा ४ खेल बराबरीमा सकिएका छन्। हंगेरीले १० भन्दा बढी खेलमा प्रतिस्पर्धा गरेका प्रतिद्वन्द्वी मध्ये पोर्चुगललाई मात्र पराजित गर्न सकेको छैन।

फ्रान्समा २०१६ भएको पछिल्लो संस्करणमा पनि समूह चरणमा भेटका यी टोलीले रोमाञ्चक ३-३ गोलको बराबरी खेलेका थिए । युरोको इतिहासमै लगातार दोस्रो टोली बन्ने होडमा छ । हालसम्म स्पेनले (२००८ र २०१२मा) मात्रै लगातार दुई पटक युरो जितेको छ ।

२०१६ को युरोमा समूह चरणका कुनै पनि खेल नहारेको हंगेरीविरुद्ध उसकै मैदानमा तीन अंक खोस्नु पोर्चुगलका लागि पक्कै सहज हुनेछैन । तर, यसअघिका ६ संस्करणमा लगातार नकआउटमा पुग्न सफल एक मात्र टोली पोर्चुगल आजको खेलमा जित हासिल गर्दै सम्भावना बलियो बनाउन चाहन्छ ।

तर, विगत हेर्ने हो भने पछिल्ला पाँच ठूला प्रतियोगिताको पहिलो खेलमा पोर्चुगलले जित निकाल्न सकेको छैन । पोर्चुगलले ठूला प्रतियोगिताको पहिलो खेल अन्तिम पटक २००८ को युरोमा जितेको थियो । उक्त खेलमा पोर्चुगलले टर्कीलाई २-० को नतिजामा पराजित गरेको थियो ।

पछिल्लो फर्म

पछिल्ला ६ खेलमा पोर्चुगल अपराजित छ । पोर्चुगलले ४ खेल जितेको छ भने दुई खेल बराबरी खेलेको छ । यता, हंगेरी पछिल्ला ११ खेलयता अपराजित छ । उसले पछिल्ला ६ खेलमध्ये चार खेल जितेको छ र दुई खेल बराबरी खेलेको छ । तर, अहिलेसम्म हंगेरीले पोर्चुगललाई हराउन सकेको छैन । त्यसैले आफ्नो घरेलु मैदानमा डिफेन्डिङ च्याम्पियनमाथि जित हासिल गर्नुपर्ने ठूलो चुनौती हंगेरीलाई छ ।