युरोकपमा आजराति १२:४५ बजे जर्मनी र फ्रान्स भिड्दै, कसले जित्ला खेल ?


खेलकुद

काठमाडौं । युरोकप २०२० अन्तर्गत आजको दोस्रो खेलमा बलिया प्रतिस्पर्धी फ्रान्स र जर्मनीबीच खेल हुँदैछ। जर्मनीको म्युनिखमा हुने खेल राति १२:४५ बजे सुरू हुनेछ। यो खेल युरोपकै दुई उत्कृष्ट टोलीको लडाईं हुने फ्रान्समा मुख्य प्रशिक्षक डिडियर देसच्याम्पले बताएका छन् ।

विश्वकप विजेता फ्रान्सलाई धेरैले यसपल्टको युरोमा सबैभन्दा बलियो दाबेदार मानिरहेका छन् । उता जर्मनी भने २०१६ मा फ्रान्ससँगै सेमिफाइनलमा पराजित भएको थियो । २०१८ मा रुसमा भएको विश्वकप फ्रान्सले जित्दा जर्मनी समूह चरणबाटै बाहिरिएको थियो । दुवै टोली पहिलो खेल जित्दै सुखद सुरुआत गर्ने योजनामा छन् । जर्मनीलाई घरेलु मैदानको साथ हुनेछ । उता फ्रान्समा करिम बेन्जामा झण्डै ६ वर्षपछि राष्ट्रिय टिममा फर्केका छन् । बेन्जामासहित किलिएन एमबाप्पे, एन्टोनी ग्रीजमन जस्ता फरवार्ड लाइन फ्रान्ससँग छ । यस्तै मिडफिल्डमा एन गोलो कान्टे, पउल पोग्वा, एड्रिओन रावओट जस्ता खेलाडी छन् ।

कप्तान ह्युगो लोरिसले गोलपोष्ट सम्हाल्नेछन् भने डिफेन्समा राफेल भरान बेन्जामिन पाभार्ड, लुकास हर्नान्डेज र प्रेसनेल किम्बेम्पे जस्ता खेलाडी हुनेछन् । उता अनुभवी गोलकिपर मानुएल नोएको कप्तानीमा रहेको जर्मनीमा थोमस मुलर र माट हुमेल्सले दुई वर्षपछि पुरनागमन गरेका छन् । यस्तै टिमो वेर्नर, काऐ हाभार्ट, सर्ज जिनाब्री, लरेस साने, जोसुअ किम्मीक जस्ता खेलाडी जर्मनी टिममा छन् । मिडफिल्डमा टोनी क्रुस र एल्के गुन्डागोनको साथ रहनेछ ।

जर्मनी र फ्रान्सबीचको खेल बहुप्रतिक्षित खेलको रुपमा पनि रहेको छ । फ्रान्सका प्रशिक्षक डिडिएर डेसच्याम्पसले यो दुवै टिमको लागि ठूलो खेल भएको बताए । उनले दुवै टिम युरोपको उत्कृष्ट टिम भएकोले ठूलो गेम हुने बताए । उनले दुवै बक्समा प्रभावशाली हुने उदेश्य रहेको र त्यहीबाट खेलको निर्णय हुने बताए ।

जर्मनी र फ्रान्सबीचको यो भेट ठूला प्रतियोगितामा छैठौं पटक हुन लागेको हो । तर, समूह चरणमा भने पहिलो पटक भिड्न लागेका हुन् । हेड टू हेड रेकर्ड हेर्ने हो भने दुवै टोलीले २-२ पटक जितेर १ खेलमा बराबरी खेलेका छन् । २०१४ विश्वकप यता फ्रान्सले ठूला प्रतियोगिताका १९ खेलमध्ये १४ खेलमा जित हासिल गरेको छ, जुन अन्य टोलीको तुलनामा सबैभन्दा धेरै हो ।