अग्रिम बधाई ! हंगेरीबिरुद्ध आज किङ रोनाल्डोले बनाउँदै छन् यी ठुला किर्तिमानहरु


खेलकुद

काठमाडौं, असार १ : युरोकपमा आज राति ९:४५ बजे साविक विजेता पोर्चुगल र हंगेरीबीच प्रतिस्पर्धा हुँदैछ। खेलअघि पोर्चुगलका कप्तान क्रिस्टियानो रोनाल्डोले आफ्नो लक्ष्य युरो कप जित्ने भएको बताएका छन्। पोर्चुगलले युरोका लागि राम्रो तयारी गरेको बताउँदै रोनाल्डोले पहिलो खेल जित्नु महत्वपूर्ण हुने बताए।

पाँचौ पटक युरोकप खेल्न लागेको रोनाल्डो युरोकपमा सर्वाधिक गोल गर्ने कीर्तिमान नजिक छन् । उनले हंगेरीविरुद्ध एक गोल गरेमा युरोकपमा १० गोल पुग्नेछ । अहिले फ्रेन्च मिचेल प्लाटिनी र रोनाल्डोको समान ९ गोल छ । हंगेरीविरुद्ध मैदान उत्रिएसँगै पोर्चुगिज सुपरस्टर क्रिस्टियानो रोनाल्डोले अर्को रेकर्ड बनाउनेछन्।

उनी पाँच संस्करणको युरो कप खेल्ने पहिलो खेलाडी बन्नेछन्। यसअघि उनले २००४, २००८, २०१२ र २०१६ मा युरो कप खेलिसकेका छन्। चार संस्करणको युरो कप खेल्ने रेकर्ड भने रोनाल्डोसँगै १७ खेलाडीको नाममा छ।

रोनाल्डोले युरोकपमा सर्वाधिक २१ खेल समेत खेलेका छन् । उनले छनोटसहित गरेर सर्वाधिक ४० गोल गरेका छन् । यस्तै अन्तर्राष्ट्रिय फुटबलमा पनि सर्वाधिक गोल गर्नेमा रोनाल्डो अहिले १०४ गोलसहित दोस्रो स्थानमा छन् र इरानका अली दाईको कीर्तिमानभन्दा उनी ५ गोलले मात्र पछि छन् ।