इन्डोनेसियनमा रोहित चन्दले गरे कमाल, बढाए नेपालको शान


खेलकुद

काठमाडौं । रोहित चन्द इन्डोनेसियन क्लब पेर्सिजा जाकर्ताको अनुभवी खेलाडी मध्ये एक हुन्। पहिलो पटक सन् २०१३ मा पेर्सिजनामा आबद्ध भएका नेपाली मिडफिल्डर रोहितले गत सिजन क्लबका लागि सय खेल पूरा गरेका थिए।

रोहितले अहिलेसम्म पेर्सिजाबाट १२२ खेल खेलिसकेका छन्। क्लबबाट सय खेल पूरा गर्दा उनी सबैप्रति आभारी छन्। पेर्सिर्जाको जर्सीमा पहिलो खेल खेल्दा आफूले सय खेल पूरा गर्ने विषयमा सोचेका पनि थिएनन्।

‘व्यवस्थापक र प्रशिक्षकलाई धन्यवाद दिन्छु, जसले ममाथि भरोसा राखेका छन्। यहाँबाट खेल्दा ठूलो गर्व र खुसी छु,’ रोहितले पेर्सिजाको आधिकारिक पोर्टलसँग कुरा गर्दै भनेका छन्। उनले आउने सिजनहरूमा पेर्सिजाको जर्सीमा खेल्ने पनि आसा व्यक्त गरे।

‘जब सुरुमा यहाँ आएँ, मैले १०० भन्दा बढी खेल पनि खेल्छु भन्ने कहिल्यै सोचेको थिएन। म जहिले पनि एक पटकमा एक खेलमा ध्यान केन्द्रित गर्दछु, त्यसैले यति टाढासम्म आइपुग्छु भन्ने सोचेको थिइन,’ उनले भने। उनले आफूलाई समर्थन गर्ने पेर्सिजाका फ्यानलाई विशेष धन्यवाद दिएका छन्।

उनले भने, ‘मलाई, मेरा सहकर्मी र क्लबलाई समर्थन र मायाका लागि धन्यवाद।’ रोहितले पेर्सिजाबाट खेल्दा सन् २०१८ को लिग वानको उपाधि, २०१८ को प्रेसिडेन्सियल कप र २०२१ को मेन्पोरा कप जितेका छन्। यस्तै सन् २०१८ मा रोहित लिग वानका सर्वोत्कृष्ट खेलाडी चुनिएका थिए। यस्तै सो सिजन उनी लिगको उत्कृष्ट ११ खेलाडीभित्र परेका थिए।

मेस्सी बार्सिलोनामै रहने मौखिक सहमति

लियोनल मेस्सीले बार्सिलोनामै रहने भएका छन् । ३४ वर्षीय मेस्सीले सन् २ हजार २६ सम्म बार्सिलोनामै बस्ने गरी नयाँ सम्झौता गर्ने भएका हुन् । नयाँ सम्झौताका लागि मेस्सी र बार्सिलोनाबीच मौखिक सहमति भइसकेको बताइएको छ ।

सम्झौतामा उनको तलब पहिले पाइरहेको भन्दा ५० प्रतिशतले घट्ने जनाइएको छ । कोभिडका कारण आर्थिक समस्यामा रहेको बार्सिलोना र मेस्सीबीचको औपचारिक सम्झौता जुन महिनाको ३० तारिखमा सकिएको थियो ।

त्यसपछि उनी दुई साता फ्रि एजेन्ट भएर बसेका थिए । यद्यपि जोन लापोर्टा बार्सिलोनाका अध्यक्ष चुनसएपछि मेस्सीले बार्सिलोनामै बस्ने इच्छा देखाएका थिए । मेस्सी सन् दुई हजारदेखि नै बार्सिलोनासँग आबद्ध छन् ।

उनले २ हजार ४ मा सिनियर टोलीमा डेब्यु गरेका थिए । बार्सिलोनाको एकेडेमीबाट आएको मेस्सीले क्लबका लागि सात सय ७८ खेलमा ६ सय ७२ गोल गरिसकेका छन् । ६ पटकको बालोन डीुओर विजेता मेस्सीले बार्सिलोनाबाट सबै उपाधि जितिसकेका छन् ।

उनको कप्तानीमा क्लबले १० पटक ला लिगा, ४ पटक च्याम्पियन्स लीग र सात पटक कोपा डेल रे को उपाधि जितिसकेको छ । यस्तै बार्सिलोना एन्टोनी ग्रिजम्यानलाई एट्लेटिको मड्रिडका मिडफिल्डर साउल निगुइजसँग साट्ने प्रस्ताव पनि गरेको छ ।