सन्दीपले ‘द हन्ड्रेड’ छोड्दा शम्सीलाई लाग्यो लट्री


क्रिकेट

काठमाडौं । नेपाली राष्ट्रिय क्रिकेट टिमका लेग स्पिनर सन्दीप लामिछानेको स्थानमा दक्षिण अफ्रीकाका ताबरेज शम्सीले ‘द हन्ड्रेड’ क्रिकेट प्रतियोगिता खेल्ने भएका छन् । इंग्ल्यान्डमा आयोजना हुने ‘द हन्ड्रेड’ क्रिकेट टिम ओभल इन्भिन्सिबलले सन्दीपको स्थानमा शम्सीलाई टिममा अनुबन्ध गरेको छ ।

भिसा समस्याको कारण सन्दीपले द हन्ड्रेड खेल्न नपाएपछि इन्भिन्सिबलले शम्सीलाई भित्र्याएको हो । सन्दीपले टिएर ५ भिसा पाएपनि प्रतियोगिता खेल्नको लागि अनुमति नपाएका हुन् ।

सन्दीप पहिलो संस्करणको प्रतियोगिताका लागि इंग्ल्यान्ड समेत पुगिसकेका थिए । उनको क्वारेन्टिन अवधि समेत सकिएको थियो । १०० बलको हुने प्रतियोगिता बिहीबारबाट सुरु हुने तालिका रहेको छ ।

स्टार्कको उत्कृष्‍ट बलिङमा वेस्टइन्डिजविरुद्ध अस्ट्रेलियाको शानदार जीत

बुधबारदेखि सुरु भएको वेस्टइन्डिजविरुद्धको एकदिवसीय श्रृंखलाअन्तर्गत पहिलो खेलमा अस्ट्रेलियाले शानदार जीत निकालेको छ । विहान सम्पन्‍न खेलमा अस्ट्रेलिया १३३ रनको फराकिलो अन्तरले विजयी भएको हो ।

खेलका क्रममा वर्षा भएपछि खेल ४९ ओभरमा झारिएको थियो र वेस्टइन्डिजले २५७ रनको लक्ष्य पाएको थियो । यद्यपि वेस्टइन्डिज आधा इनिङमै अलआउट भयो । वेस्टइन्डिज २६.२ ओभरमा १२३ रनमा अलआउट भयो । कप्तान कायरन पोलार्डले ५६ रन बनाएर टोलीको रन उकास्दै लाज बचाए । कुनै समय वेस्टइन्डिज २७-६ को अवस्थामा पुगिसकेको थियो ।

वेस्टइन्डिजको इनिङ ध्वस्त पार्न मिचेल स्टार्कले ५ विकेट लिए । यो उनको करियरको आठौं पाँच-विकेट-प्रदर्शन हो । त्यसैगरी जोश हेजलवूडले ३ विकेट लिँदा एडम जाम्पा र मिचेल मार्शले १-१ विकेट लिए ।

त्यसअघि बार्बडोसमा टस जितेर पहिले ब्याटिङ गरेको अस्ट्रेलियाले निर्धारित ४९ ओभरमा ९ विकेट गुमाएर २५२ रन बनाएको थियो । फिन्चको अभावमा पहिलोपटक कप्तानी गरेका एलेक्स केरीले ६७ रन बनाए भने एस्टन टर्नरले ४९ रन बनाए ।

जोसुवा फिलिपेले ३९, बेन मेक्डरमोटले २८, मिचेल मार्शले २० रन बनाए । वेस्टइन्डिजका तर्फबाट पनि हेडन वाल्शले ५ विकेट लिए भने अकेल हुसेन र अल्जारी जोसेफले २-२ विकेट लिए । जीतसँगै अस्ट्रेलियाले ३ खेलको श्रृंखलामा १-० को अग्रता बनाएको छ । दोस्रो खेल शुक्रबार हुनेछ ।