‘द हन्ड्रेड’ खेल्न बेलायत पुगेका सन्दीप खेल्न नपाएपछि रित्तो हात नेपाल फर्किए


क्रिकेट

फाईल फोटो
काठमाडाैं । नेपाली क्रिकेट टोलीका स्पिनर सन्दीप लामिछाने आज नेपाल आइपुगेका छन् । इंग्ल्यान्ड तथा वेल्स क्रिकेट बोर्डको आयोजनामा हुने द हन्ड्रेड प्रतियोगिता गुमाउने भएपछि सन्दीप आज दिउँसो नेपाल आइपुगेका छन् ।

युके पुगेको टाएर फाइभ भिसामा द हन्ड्रेड खेल्न नपाउने भएपछि उनी स्वदेश फर्केका हुन् । बिहिबारदेखि सुरु भएको प्रतियोगितामा सन्दीप ओभल इन्भिन्सिबल्समा अनुबन्ध भएका थिए । भिसाकै कारण उनले अघिल्लो महिना आयोजना भएको टि २० ब्लास्ट क्रिकेटसमेत गुमाएका थिए ।

सन्दीप प्रतियोगिता पूर्ण रुपमा बाहिर हुने भएपछि उनको स्थानमा टिमले दक्षिण अफ्रिकी स्पिनर तबरेज शाम्सीलाई खेलाउने निर्णय गरीसकेको छ ।

सीताको ब्याटिङ बरियतामा सुधार

नेपाली राष्ट्रिय महिला टोलीका उपकप्तान सीता राना मगरको ब्याटिङ बरियतामा सुधार भएको छ । अन्तर्राष्ट्रिय क्रिकेट परिषद् (आइसीसी)ले सार्वजनिक गरेको पछिल्लो टी–२० क्रिकेटको ब्याटिङ बरियताअनुसार उनी ९०औँ स्थानमा रहेकी छिन् । यसअघि मगर ९२औँ बरियतामा स्थानमा रहेकी थिइन् ।

आइसीसीको बरियतामा पर्ने उनी एकमात्र नेपाली महिला क्रिकेट खेलाडी हुन् । महिला क्रिकेटको ब्याटिङतर्फ भारतकी शफाली वर्मा शीर्ष स्थानमा, अष्ट्रेलियाकी बेथ मोनी दोस्रो, भारतकी स्मृति मन्धाना तेस्रो, अष्ट्रेलियाकी मेग लानिङ चौथो तथा अष्ट्रेलियाकी एलिसा हेली पाँचौँ स्थानमा रहेका छन् । नेपाल आइसीसी महिला टी–ट्वान्टी क्रिकेटको बरियतामा भने यथास्थानमा रहेको छ ।

आइसीसीले सार्वजनिक गरेको नयाँ बरियतामा नेपालको स्थान १४ रहेको छ । नेपाल एकदिवसीय महिला क्रिकेटको बरियतामा भने हालसम्म पर्न सकेको छैन । टी २० तथा एकदिवसीय क्रिकेटतर्फ बलिङको महिला बरियतामा नेपालबाट कुनै खेलाडी पर्न सकेका छैनन् ।