सन्दीप लामिछाने बिना पनि ‘द हन्ड्रेड’मा ओभल इन्भिन्सिबल्स शानदार जित, चम्किए यी खेलाडी


क्रिकेट

काठमाडौं : क्रिकेटको नयाँ प्रारूप ‘द हन्ड्रेड’मा पुरुषतर्फ ओभल इन्भिन्सिबल्सले विजयी सुरुवात गरेको छ । उसले बिहीबार भएको उद्घाटन खेलमा म्यानचेस्टर ओरिजिनल्समाथि ९ रनको जित दर्ता गरेको हो ।

ओभलले दिएको १४६ रनको लक्ष्य पछ्याउने क्रममा म्यानचेस्टरले १०० बलकै सामना गरे पनि ७ विकेट गुमाएर १३६ रन मात्र बनाउन सक्यो । म्यानचेस्टरका लागि कार्लोस ब्रेथवेटले सर्वाधिक ३७ रनको योगदान दिए । कोनिल मुनरोले २६ र केल्भिन ह्यारिसनले २३ रन जोडे ।

ओभलका लागि साम करन र नाथन स्वटरले समान २-२, सुनिल नारायण, रीस टोप्ली र टम करनले १-१ विकेट लिए । त्यसअघि लन्डनमा टस हारेर ब्याटिङको निम्तो पाएको ओभलले निर्धारित १०० बलमा ८ विकेट गुमाउँदै १४९ रनको योगफल तयार पारेको थियो ।

ओभलका लागि कप्तान साम विलिंग्सले सर्वाधिक ४९ रनको योगदान दिए । टम करनले अविजित २९ र जेसन रोयले २० रन जोडे । म्यानचेस्टरका फ्रेड क्लासेनले ३, टोम हार्थली र स्टिभन फिनले समान २-२ विकेट हात पार्दा म्याट पार्किनसनले १ विकेट लिए ।

नेपाली क्रिकेट टोलीका स्पिनर सन्दीप लामिछाने पनि ओभल इन्भिन्सिबल्समा अनुबन्ध भएका थिए । युके पुगेको टाएर फाइभ भिसामा द हन्ड्रेड खेल्न नपाउने भएपछि उनी नेपाल फर्किएका छन् ।

घरेलु टोली जिम्बावेमाथि बंगलादेशकाे सहज जित

बंगलादेशले पहिलो टी२० आई सिरिजमा घरेलु टोली जिम्बावेमाथि ८ विकेटको सहज जित निकालेको छ। जितको लागि १ सय ५३ रनको विजयी लक्ष्य पछ्याएको बंगलादेशले १८.५ ओभरमा २ विकेटको क्षतिमा पूरा गर्यो। याेसँगै पाहुना टाेली बंगलादेशले तीन टी२० आई सिरिजमा १-० को अग्रता लिएको छ।

बंगलादेशका ओपनर मोहम्मद नईम ६३ रनमा अविजित रहे। उनले ५१ बलमा ६ चौका प्रहार गरेका थिए। यस्तै, नुरुल हसन १६ रनमा अविजित रहे। यता, सौम्य सरकार ४५ बलमा ४ चौका र २ छक्कासहित ५० रनमा रन आउट भए। कप्तान महमुदूल्लाह रियादले १५ रन बनाए। त्यसअघि हरारे स्पोर्ट्स क्लबमा टस जितेर पहिला ब्याटिङ थालेकाे जिम्बावे १९ ओभरमा १ सय ५२ रनमा अल आउट भएको थियो।

जिम्बावेका विकेटकिपर रेजिस चकब्भाले सर्वाधिक ४३ रनको योगदान दिए। उनले २२ बलमा ५ चौका र २ छक्का प्रहार गरेका थिए। यस्तै, डियोन मायर्सले ३५, वेस्ले मेधभरेले २३, ल्यूक जोंग १८ रनको योगदान दिए।

बंगलादेशका तीव्र गतिका बलर मुस्ताफिजुर रहमानले ३ विकेट लिए। मोहम्मद सैफुद्दिन र शोरिफुल ईस्लामले २/२ विकेट लिए। सकिब अल हसन र सौम्य सरकारले एक/एक विकेट लिए।