२१ बर्षिय सान्चो बने मंहगो खेलाडी, उनलाई म्यानचेस्टर युनाइटेडले दिएको रकम थाह पाउँदा सबै चकित


खेलकुद

काठमाडौं : इङ्लिस प्रिमियर लिग क्लब म्यानचेस्टर युनाइटेडले युवा विंगर जेडन सान्चोलाई अनुबन्धित गरेको छ । सान्चोलाई म्यानचेस्टर युनाइटेडले जर्मन बुन्डेसलिगा क्लब बोरुसिया डर्टमण्डबाट सात करोड ३० लाख पाउन्डमा भित्राएको हो।


यससँगै ह्यारी म्यागुएरपछि २१ वर्षे सान्चो क्लबको दोस्रो महंगो खेलाडी बनेका छन्। युनाइटेडले म्यागुयरलाई आठ करोड पाउन्डमा भित्राएको छ। सान्चोले युनाइटेडसँग पाँच वर्षे लामो सम्झौता गरेका छन् । स्थान्तरणका लागि आवश्यक स्वास्थ्य जाँच भने उनले गएको महिना नै गरिसकेका थिए ।

‘डर्टमन्डले मलाई सिनियर टिममा खेल्ने मौका दियो । यसका लागि म कृतज्ञ छु । डर्टमन्डमा म खुशी भए पनि मेरो चाहना इंग्ल्यान्ड फर्कने नै थियो । त्यसकारण म युनाइटेडसँग आबद्ध भएको छु । इंग्लिस प्रिमियर लिग खेल्न म आतुर छु,’ सान्चोले भनेका छन् । उनले युनाइटेडमा प्रतिभाशाली युवा खेलाडीहरू भएकाले टिमले समर्थकले चाहेको सफलता प्राप्त गर्नसक्ने प्रतिक्रिया दिए ।

उता युनाइटेडका प्रशिक्षक ओले गनर सोल्स्यारले सान्चो युनाइटेडको परम्परामा भिज्न सक्ने फरवार्ड भएको बताए । ‘उनी युनाइटेडको अभिन्न अंग बन्ने छन् । उनी हाम्रा लागि फिट हुने खेलाडी हुन् । युनाइटेडको इतिहास हेर्ने हो भने, क्लबका लागि उत्कृष्ट फरवार्डहरुले खेलेका छन् । सान्चे पनि त्यही सूचीमा पर्छन्,’ सोल्सयारले भनेका छन् ।

सान्चोले डर्टमण्डका लागि १ सय ३७ खेलमा ५० गोल गरेका छन्। उनले ५७ असिस्ट समेत गरेका छन्। सान्चो २०१५ मा म्यानचेस्टर सिटीको एकेडेमीमा आबद्द भएका थिए। दुई वर्ष सिटीको एकेडेमीमा बसेर उनी २०१७ मा डर्टमण्ड पुगेका थिए। सान्चोले इङ्ल्यान्डका लागि २२ खेलमा ३ गोल गरिसकेका छन्।