नो रोनाल्डो नो मेसि ! यी हुन् टोकियो ओलम्पिक फुटबलमा देखिने १० ठुला स्टारहरु


खेलकुद

काठमाडौं : जापानको टोकियोमा शुक्रबारदेखि गृष्मकालीन ओलम्पिक खेलकुद सुरु भइसकेको छ। प्रतियोगितामा पुरुष फुटबलमा अर्जेन्टिना, अस्ट्रेलिया, ब्राजिल, आइभरिकोष्ट, इजिप्ट, फ्रान्स, जर्मनी, होन्डुरस, जापान, दक्षिण कोरिया, मेक्सिको, न्युजिल्यान्ड, रोमानिया, साउदी अरब, दक्षिण अफ्रिका र स्पेनसहित १६ टोलीले प्रतिस्पर्धा गर्दैछन्।

पुरुषतर्फ ब्राजिल साविक विजेता हो। महिलातर्फ जर्मनीले गत संस्करणको उपाधि जितेको थियो। सिनियर टोलीहरुले खेल्ने दुई ठुला महादेशीय फुटबल प्रतियोगिता युरो कप र कोपा अमेरिकालगत्तै ओलम्पिकमा फुटबलतर्फ प्रतिस्पर्धा हुँदैछ।

प्रतियोगिताको पुरुष फुटबलमा यू-२४ राष्ट्रिय टोली (सन् १९९७ जनवरी १ तारिखपछि जन्मिएका)ले प्रतिस्पर्धा गर्दैछन्। तर एउटा टोलीमा बढीमा ३ जना बढी उमेरका खेलाडीलाई राख्न पाउने व्यवस्था छ।

युरो कपको फाइनल पुगेको स्पेनका गोलरक्षक उनाई सिमोन, मिडफिल्डर पेड्री, डानी ओल्मो, मार्को आसेन्सियो, मिकेल ओयार्जबल, एरिक गार्सिया नाम चलेका अनुहार हुन्। कोपा अमेरिका जितेको अर्जेन्टिनामा प्राय सबै नयाँ खेलाडी छन्। लियोनल मेस्सी, सर्जियो एगुएरो, एन्जेल डी मारियासहित नाम चलेका कुनैपनि खेलाडी टोलीमा छैनन्।

ब्राजिलमा रिचारलिसन, पाउलिन्हो, ड्यानी आल्भेस, माल्कोमलगायत खेलाडी छन्। नेमार टोलीमा छैनन्। फ्रान्सका पनि अधिकांश नयाँ खेलाडी छन्। केलियन एमबाप्पे, पल पोग्बा, एन्टोइन ग्रिजम्यान, कान्टेलगायत कोहि पनि नाम चलेका खेलाडी छैनन्। जर्मनीले पनि प्राय सबै नयाँ अनुहारलाई स्थान दिएको छ।

पुरुष फुटबलमा पहिलो चरणमा चार वटा समूह छन्। समूह ‘ए’मा मेक्सिको, जापान, दक्षिण अफ्रिका र फ्रान्स छन्। समूह ‘बी’मा न्युजिल्यान्ड, होन्डुरस, रोमानिया र दक्षिण कोरिया छन्। समूह ‘सी’मा इजिप्ट, स्पेन, अर्जेन्टिना र अस्ट्रेलिया तथा समूह ‘डी’मा आईभरिकोस्ट, ब्राजिल, जर्मनी र साउदी अरब छन्।