अफ्रिदीको नेपाल भ्रमण हात्ती आयो हात्ती आयो फुस्सा ! ब्याटसम्म नछोई पाकिस्तान फर्किए


क्रिकेट

काठमाडौं । एभरेष्ट प्रिमियर लिग (ईपीएल) को चौंथो संस्करणमा पाकिस्तानी स्टार शाहिद अफ्रिदीको ब्याटिङ हेर्न आतुर समर्थकहरु निराश बनेका छन् । ईपीएलमा एकचोटि पनि ब्याट नचलाइ उनी आज स्वदेश फर्किँदैछन् । उनी सोमबार साँझ स्वदेश फिर्ता हुन लागेका हुन्। विराटनगरसँगको खेल स्थगित भएको केही समयमै अफ्रिदीले टियु मैदान छाडेका थिए।

अफ्रिदी खेलभन्दा पनि मनोरञ्जन र कूटनीतिक भेटघाट बढी ब्यस्त देखिए। उनले शुक्रबार राष्ट्रपति विद्यादेवी भण्डारीसँग भेटवार्ता गरेका थिए। अफ्रिदीले नेपाल बसाइको क्रममा नेपाल मुश्लिम आयोगसँग पनि छलफल गरेका थिए।

अफ्रिदी आफ्नो फाउन्डेसनको व्यस्तताका कारण भन्दै सुरुआती दुई खेलमात्रै खेल्नेगरी नेपाल आएका थिए । उनले किङ्स ११ काठमाडौंबाट शनिबार पहिलो म्याच खेले । तर, आज बिहान तय भएको काठमाडौंको दोस्रो खेल मैदान चिसो भएका कारण स्थगित गरियो । पहिलो म्याचमा ब्याटिङ गर्न नआएका अफ्रिदी दोस्रो म्याच स्थगित भएपछि मैदानमा ब्याट नै नसमाइ फर्किन लागेका हुन् ।

सन्दीप लामिछानेको कप्तानीमा भएको काठमाडौले पहिलो खेलमा साविक विजेता ललितपुर प्याट्रिओट्समाथि ७ विकेटको शानदार जित निकालेको थियो । उक्त खेलमा अफ्रिदीले चार ओभर बलिङ गरेका थिए । त्यसमा उनले ३६ रन खर्चिँदा कुनै विकेट लिन सकेनन् । बरु एउटा क्याच लिएर दर्शकलाई आफ्नो सिग्नेचर पोज देखाए ।

उक्त म्याचमा अफ्रिदी ब्याटिङ गर्न आएनन् । उनलाई मध्यक्रमबाट खेलाउने तयारी थियो । तर अगाडिका ब्याट्यम्सानहरुले नै टिमलाई जिततर्फ डोर्‍याएपछि अफ्रिदीको आवश्यकता नै परेन । उक्त म्याचमा अफगानिस्तान र जिम्वावेका ब्याट्सम्यानले विष्फोटक अर्धसतक प्रहार गरेका थिए ।

अफ्रिदीको आज अन्तिम खेल भएकाले उनको ब्याटिङ हेर्न त्रिवि मैदानमा पुगेका दर्शक निराश बनेका छन् । ईपीएलको चौंथो संस्करणमा सहभागी विदेशी खेलाडीमध्ये उनी सर्वाधिक चर्चामा थिए । उनले केही नेपाली खेल अधिकारीहरुलाई पाकिस्तान भ्रमणको निम्तो दिएको पनि बताएका छन्। उनले यसपटको नेपाल बसाइ छोटो भएको कारण अर्को पटक परिवारलाई साथै लिएर आउने बाचा गरेका छन्।

‘यो भ्रमणमा मैले पूरै नेपाल राम्रोसँग घुम्‍न पाइनँ। छोटो भ्रमण छ। माउन्टेन फ्लाइट गएँ। सगरमाथा देखेँ। सँगै अन्य हिमालहरु हेरेँ। मेरो रोमाञ्चक अनुभव रह्यो। त्यसैले म परिवारलाई साथै लिएर आउन चाहन्छु। किनभने मेरो साथ परिवार भयो भने तुरुन्त फर्किने हतारो हुने छैन। सहरभन्दा बाहिर गएर नेपाल हेर्न चाहन्छु,’ उनले भनेका छन्। अफ्रिदी फर्केसँगै अब उनको स्थानमा सिंगापुरका अलराउन्डर जनक प्रकाशले खेल्नेछन्। २१ वर्षीय जनक दायाँ हाते ब्याट्सम्यान र दायाँ हाते बलर हुन्।