नेपालीबाट मायाले गदगद भए अफ्रिदी ! पाकिस्तान पुग्ने बित्तिकै भने : ‘नेपालमा रहँदा घरजस्तै महसुस भयाे’


क्रिकेट

काठमाडौं । एभरेस्ट प्रिमियर लिग ईपीएल खेल्न नेपाल आएका पाकिस्तान क्रिकेट टिमका पूर्वकप्तान शाहिद अफ्रिदी पाकिस्तान फर्किसकेका छन् । पाकिस्तान फर्किएपछि सामाजिक सञ्जालमा ट्वीट गर्दै अफ्रिदीले आतिथ्य सत्कारका लागि नेपालीलाई धन्यवाद दिएका छन् ।

‘शाही आतिथ्य सत्कारका लागि नेपालीलाई हृदयदेखि नै धन्यवाद र म विमानबाट बाहिर निस्किनेबित्तिकै घरजस्तै महसुस भयाे । निकै धेरै सम्झना लिएर घर फर्किएकाे छु’, उनले ट्विटरमा लेखेका छन् । साथै अफ्रिदीले नेपाल र पाकिस्तानबीच खेलकाे याेजना बनाएकाे पनि ट्विटरबाटै जानकारी गराएका छन् ।

अफ्रिदी काठमाण्डाै किङ्ग्स इलेभेनबाट चाैथाै संस्करणकाे ईपीएलकाे दुई खेल खेल्न गएकाे बिहीवार नेपाल आएका थिए । उनले दुई खेल खेल्ने कार्यक्रम रहे पनि एक खेलमात्र खेलेर फर्किएका हुन् । गएकाे शनिवार अफ्रिदीले ललितपुर प्याट्रियटर्सविरुद्ध खेलेका थिए । त्यस खेलमा ४ ओभरमा ३२ रन दिएका अफ्रिदीले विकेट हात पारेनन् । काठमाण्डाैले ललितपुरलाई सात विकेटले हराएकाे खेलमा उनले ब्याटिङ गर्नुपरेको थिएन ।

इपिएल मंगलबारकाे खेल स्थगित

एभरेष्ट प्रिमियर लिग (इपिएल) मा लगातार तेस्रो खेल स्थगित भएको छ। टियु मैदानमा आज (मंगलबार) आयोजित खेल खराब मौसमका कारण स्थगित भएको हो। आज काठमाडौं किंग्स इलेवेन र पोखरा राइनोजबीचको खेल हुने तािलका थियाे।

स्थगित खेलका लागि ईपीएलले नयाँ तालिका सार्वजनिक गर्नेछ। सोमबार पनि निर्धारित दुवै खेल स्थगित भएका थिए। आइतबार पनि दोस्रो खेल पनि पूरा समय हुन नसक्दा पोखरा र भैरहवा ग्लाडियटर्सले अंक बाँडे।

सोमबार पहिलो खेल काठमाडौं र विराटनगर वारियर्सबीच निर्धारण भएको थियो। पर पानी परेर मैदान भिजेपछि खेल स्थगित भएको थियो। दिउँसोका लागि निर्धारित भैरहवा र चितवन टाइगर्सको खेल स्थगित भएको थियो।