गोलको खडेरी तोड्दै मेसिले आज म्यानचेस्टर सिटीबिरुद्ध गोलको बर्षा गर्ने


खेलकुद

काठमाडौं । युइएफए च्याम्पियन्स लिगको समूह चरणको दोस्रो चरणको खेलमा मंगलबार राति समूह ‘ए’ का फ्रेन्च क्लब पेरिस सेन्ट जर्मेन (पिएसजी) र इंग्लिस क्लब म्यानचेस्टर सिटी आमनेसामने हुने भएका छन् । खेल पिएसजीको घरेलु मैदान पार्क डे प्रिन्सेसमा नेपाली समयअनुसार राति पौने १ बजे हुनेछ । स्टार खेलाडीले भरिएको दुई टोलीबीचको खेल निकै रोमाञ्चक र प्रतिस्पर्धात्मक हुने अपेक्षा गरिएको छ ।

 

पिएसजी समूह चरणमा पहिलो जितको खोजीमा हुनेछ । पिएसजीले पहिलो खेलमा क्लब ब्रुगसँग १–१ गोलको बराबरी खेलेको थियो । चोटका कारण मेस्सीले खेल्ने नखेल्ने तय नभए पनि उनी टोलीको प्रशिक्षणमा भने सहभागी भएका छन् । चोटका कारण मेस्सीले पछिल्लो दुई खेल गुमाएका थिए ।

ग्वार्डिओलाको टिमविरुद्ध मेस्सीले गोल थप्लान् ?

विश्वमा लियोनेल मेस्सी र पेप ग्वार्डीओलाले कुनै समय एकसाथ रहँदा सर्वाधिक सफल सम्बन्ध बनाएका थिए । बार्सिलोनामा रहँदा खेलाडी र प्रशिक्षकका बिचमा सर्वाधिक सफल जोडी भनेको मेस्सी र ग्वार्डिओलाको थियो । उनीहरूले चार वर्ष सँगै रहँदा १४ ट्रफी जितेका छन् ।

उनीहरू जति समय सँगै रहे सिङ्गो युरोपेली फुटबलमा उनीहरूको रवाफ रह्यो । ग्वार्डिओलाले बार्सिलोना छाडेपछि च्याम्पियन्स लिगमा कुनै एक खेलाडीबाट धेरै गोल खाएका छन् भने ती खेलाडी मेस्सी नै हुन् । अहिले मेस्सी पनि बार्सिलोना छाडेर पीएसजी गएका छन् । पीएसजीबाट केही खेल खेलिसक्दा उनले गोल भने गर्न सकेका छैनन् । त्यसैले आज आफ्ना पूर्वप्रशिक्षकविरुद्ध उनले गोलको खाता खोल्ने प्रतीक्षा पनि उनका समर्थकहरूले गरेका छन् ।

मेस्सीले चार च्याम्पियन्स लिग खेलमा ग्वार्डिओला प्रशिक्षक रहेको टीमविरुद्ध ६ गोल गरेका छन् । ग्वार्डिओलाले भनेका छन्‚ ‘मेस्सी अविश्वसनीय छन्, साँच्चिकै बलिया र छरिता छन्, मैले अभ्यास गराएका खेलाडीमध्येकै उत्कृष्ट । उनी सर्वकालीन महान खेलाडी हुन् । म उनलाई पेलेसँग तुलना गर्न मन पराउँछु ।’

ग्वार्डिओलाले मेस्सीसँगै बिताएको समय जीवनकालकै सर्वाधिक स्वर्णिम समय रहेको पनि बताएका छन् । उनले भने‚ ‘मेरो जीवनमा सर्वाधिक राम्रो समय मेस्सीसँग बिताएको समय हो‚ जति समय हामी सँगै रह्यौँ त्यो समय साँच्चिकै उत्कृष्ट समयका रुपमा रह्यो ।’ पीएसजी र सिटीको खेललाई बहुप्रतिक्षित मानिएको छ ।

मंगलबार राति नै एसी मिलानले एट्लेटिको म्याड्रिड, आयाक्स र बेसिकटास, इन्टर मिलान र सख्तर डोनेस्क तथा लिभरपुल र पोर्टोले प्रतिस्पर्धा गर्नेछन् । बुधबार भने म्यानचेस्टर युनाइटेड र भिल्लारियल खेल्नेछन् ।