जापानमा नेपाली फूटबलको लज्जास्पद हार


खेलकुद

काठमाडौं । जापानमा रहेको नेपाली राष्ट्रिय फुटबल टोलीले तेस्रो मैत्रीपूर्ण खेलमा लज्जास्पद हार बेहोरेको छ। एएफसी एसियन कप छनोटको तयारीका लागि जापान भ्रमणमा रहेको नेपाली टोलीले बिहीबार बिहान भएको खेलमा अमिटी स्पोर्टस क्लबसँग ५–० को हार बेहोरेको हो ।

खेलको चौथो मिनेटमै यामाकोमो डाइकीको गोल गर्दै जापानी टोलीलाई अग्रता दिलाएका थिए। १६ औं मिनेटमा योसहियोकाले र ३४ औं मिनेटमा ताकाहासीले थप गोल गरेपछि पहिलो हाफमा नेपाल ३–० ले पछि परे।

दोस्रो हाफमा घरेलु टोलीले नेपाली पोष्टमा थप दुई गोल थप्यो। मोरिया ताकाजिनले ५६ औं र होरिनो जुनले ५७ औं मिनेटमा गोल गरेपछि नेपाल ५–० ले फराकिलो पराजय भोग्नुपर्यो।

नेपाललाई पराजित गर्ने अमिटी स्पोर्टस जापानको क्षेत्रीय लिगमा प्रतिस्पर्धा गर्ने क्लब हो। नेपालले यसअघि खेलेका दुई खेलमा भने एकमा बराबरी र अर्कोमा जित निकालेको थियो।

नेपालले शुक्रबार हानान विश्वविद्यालयसँग नेपाली समयअनुसार १ः१५ बजे प्रतिस्पर्धा गर्दैछ। नेपालखबरबाट