नेपाली भान्जा सुनिल क्षेत्रीले किङ मेसिको किर्तिमान तोडे, रोनाल्डोको रेकर्ड भने सपनामा पनि तोड्न सक्दैनन्


खेलकुद

काठमाडौं । भारतीय फुटबल कप्तान सुनिल क्षेत्रीले अन्तर्राष्ट्रिय गोल संख्यामा अर्जेन्टाइन फुटबल स्टार एवं कप्तान लियोनल मेसीसँग बराबरी गरेका छन् । ३७ वर्षीय सुनिलले माल्दिभ्सको मालेमा शनिबार राति सम्पन्न साफ च्याम्पियनसिपको फाइनलमा नेपालविरुद्ध गोल गरेसँगै मेसीसँग बराबरी गरेका हुन् ।

दुवैको अन्तर्राष्ट्रिय गोल संख्या ८० पुगेको छ । ३७ वर्षीय सुनिलले १२४ खेलमा ८० गोल गरेका हुन् । जबकि ३६ वर्षे मेसीले उक्त गोल संख्या १५६ खेलमा मात्र पूरा गरेका हुन् । सुनिल भन्दा अगाडि हाल सक्रिय खेलाडीमा पोर्चुगलका कप्तान क्रिष्टियानो रोनाल्डोमात्र रहेका छन् । रोनाल्डोले ११५ गोल गरिसकेका छन् ।

साफ च्याम्पियनसिपमा पाए अवार्ड नै अवार्ड, नेपाली मामाहरु रित्तो हात

साफ च्याम्पियनसिप २०२१ को व्यक्तिगत विधाको अवार्डमा नेपालको भान्जा भारतका कप्तान सुनिल क्षेत्रीले वर्चस्व जमाएका छन् । भारतलाई उपाधि दिलाउन महत्त्वपूर्ण भूमिका खेलेका सुनिलले फाइनलको म्यान अफ द म्याचसहित प्रतियोगिताको दुई मुख्य अवार्ड पनि हात पारे ।

प्रतियोगिता अवधिभर ५ गोल गर्दै सुनिल सर्वाधिक गोलकर्ता बने । त्यस्तै टोलीको उपाधि जितमा निर्णायक बनेका उनले प्रतियोगिताको सर्वोत्कृष्ट खेलाडीको उपाधि पनि हात पारे । प्रतियोगिताको फेयर प्ले अवार्ड भने आयोजक माल्दिभ्सले पायो ।

फाइनलमा नेपालमाथि ३-० को जितमा सुनिलकै गोलमा भारतले अग्रता लिएको थियो । त्यसअघि लिग चरणमा नेपालविरुद्ध जितमा समेत निर्णायक गोल गरेका सुनिल भारतीय आक्रमणमा मुख्य खेलाडी थिए ।

सुनिलले प्रतियोगितामा ५ खेलमा ५ गोल गरे । पहिलो खेलमा बंगलादेशविरुद्ध १-१ को बराबरीमा सुरुवाती अग्रता दिलाएका उनले नेपालविरुद्ध जितमा एकमात्र गोल गरेका थिए । माल्दिभ्सविरुद्ध ३-१ को जितमा दुई गोल गरेका सुनिलले फाइनलमा पनि सुरुवाती अग्रता दिलाएका थिए ।

सुनिलले यससँगै आफ्नो अन्तर्राष्ट्रिय गोलसंख्या ८० पुर्याएका छन् । उनले समग्रमा नेपालविरुद्ध १२ औं खेलमा ८ गोल गरे । सुनिलले साफ च्याम्पियनसिपमा मात्र आफ्नो गोलसंख्या १८ पुर्याएका छन् । उनी सन् २०११ को साफ च्याम्पियनसिपमा पनि ७ गोल गर्दै सर्वाधिक गोलकर्ता बनेका थिए ।