ए मेरो हजुर-२ को अर्को गीत ‘उकालीमा जाँदा’ सार्वजनिक (भिडियो)


मनोरन्जन

काठमाडौँ । भाद्र १६ गतेलाई रिलिज कन्फर्म गरिएको वर्षको प्रतिक्षित फिल्म ‘ए मेरो हजुर २’ को तेस्रो गीत रिलिज भएको छ । बिहीवार राजधानीमा एक कार्यक्रमका बीच फिल्ममा समाबेश ‘उकालीमा जाँदा जाँदै’ बोलको सार्वजनिक गीतमा राजेश पायल राई र इन्दिरा जोशीको स्वर रहेको छ । शब्द र संगीत बसन्त सापकोटाको रहेको सो गीतमा सम्राज्ञी, सलिनका अलावा सलोन बस्नेत लगायतले अभिनय गरेका छन् । यस अघि सार्वजनिक भएका दुई गीतले दर्शकको राम्रो साथ् पाइसकेका छन् । भिडियो हेर्नूस् :-

गीतमा फिल्मका कलाकारहरु मस्ती मूडमा देखिएका छन् । यसअघि फिल्मको ट्रेलरसँगै ‘कसम हो’ र ‘किनीदेउ न साइला दाई’ बोलको गीत सार्वजनिक भैसकेको छ ।

बसन्त सापकोटाको संगीत रहेको फिल्ममा बसन्त अधिकारी सहायक निर्देशकको रुपमा रहेका छन्। झरना थापा निर्देशित यो फिल्म ‘ए मेरो हजुर’ को सिक्वेल हो । स्व.शिब रेग्मीको निर्देशन रहेको ‘ए मेरो हजुर’मा झरना थापा र स्व.नायक श्रीकृष्ण श्रेष्ठले मुख्य भुमिका थियो । सुहाना इन्टरटेनमेन्टको ब्यानरमा सुनीलकुमार थापाले निर्माण गरेको फिल्मको कथा हरिहर अधिकारीले लेखेका हुन् भने फिल्मको पटकथा सामीप्यराज तिमल्सेनाको हो । फिल्मलाई सन्जय लामाले खिचेका हुन् ।  तस्बिर : डिसी नेपाल