स्टार खेलाडीले भरिएको पीएसजीको लज्जास्पद हार


खेलकुद

एजेन्सी : स्टार खेलाडीले भरिएको पेरिस सेन्ट जर्मेनलाई पराजित गर्दै म्यानचेस्टर सिटी यूईएफए च्याम्पियन्स लिगको समूह ‘ए’ को विजेताको रूपमा नकआउट चरणमा स्थान सुरक्षित गरेको छ । गएराति सिटीले घरेलु मैदान एतिहादमा पिएसजीलाई २-१ गोल अन्तरले पराजित गरेको हो । खेलमा तीनै गोल दोस्रो हाफमा सम्भव भएको थियो ।

भ्रमणकारी टोली पिएसजीका केलियन एमबाप्पेले खेलको ५० औँ मिनेटमा टोलीको लागि अग्रता लिएका थिए । तर रहिम स्टर्लिङले खेलको ६३ औँ मिनेटमा बराबरी गोल गरे भने ग्रावियल जेसुसले ७६ औँ मिनेटमा २-१ को अग्रता बनाए ।

स्पेनिस क्लब रियम मड्रिडबाट पेरिस झरेका सर्जियो रामोस सिटीविरुद्ध टोलीमा समावेश भएपनि डेब्यु भने गर्न पाएनन् । सिटीविरुद्ध पिएसजीले लियोनल मेस्सी, नेयमार र एमबाप्पेको जोडीलाई अग्रपंक्तिको जिम्मेवारी दिए पनि सफल भएनन् । यस समूहबाट सिटी समूह विजेताको रूपमा अन्तिम १६ मा स्थान बनाउँदा पिएसजी उपविजेताको रूपमा नक आउट चरणमा स्थान बनायो ।

समूह ‘ए’ को अर्को खेलमा आरबी लाइपजिगले क्लब ब्रुगलाई ५-० ले पराजित गर्‍याे । जितसँगै सिटीले ५ खेलमा १२ अंक जोड्दै शीर्षस्थान कब्जा गर्‍याे । पिएसजी समान खेलमा ८ अंकसहित दोस्रो स्थानमा छ । लाइपजित र ब्रुगको समान ४ अंक रहेको छ ।