न्युजिल्यान्डविरुद्धको टेस्टअघि भारतलाई अर्को झड्का


क्रिकेट

काठमाडौं । न्युजिल्यान्डविरुद्धको टेस्ट शृंखलाअघि भारतीय क्रिकेट टोलीलाई अर्को झड्का लागेको छ । भारतका ओपनर केएल राहुलले चोटका कारण न्युजिल्यान्डविरुद्ध दुई खेलको टेस्ट शृंखला गुमाउने भएका छन् । कप्तान विराट कोहलीले पहिलो खेल नखेल्ने बताएका छन् । ब्याट्सम्यान रोहित शर्मासहित विकेटकिपर रिषभ पन्त तथा तीव्र गतिका बलर जसप्रित बुमराह र मोहम्मद शामीलाई टेस्ट शृंखलाभर आराम दिइएको छ ।

ओपरन राहुलको मंगलबार बायाँ तिघ्राको मसलमा चोट लागेको भारतीय क्रिकेट बोर्डले जनाएको छ । ‘‘राहुलले अब नेसनल क्रिकेट एकेडेमीमा रिहाब गर्नेछन् । र, अर्को महिना हुने दक्षिण अफ्रिकाविरुद्धको शृंखलाका लागि तयारी गर्नेछन्, ’’ बीसीसीआईले भनेको छ । राहुलको स्थान सूर्यकुमार यादवले लिनेछन् । सूर्यकुमारले भारतीय टोलीबाट सेतो बलको क्रिकेट खेले पनि टेस्टमा डेब्यु हुनेछ । न्युजिल्यान्डविरुद्धको टेस्ट कानपुरमा बिहीबारदेखि सुरु हुनेछ ।

भारतीय टोली : अजिन्क्या रहाने (कप्तान), मयांक अग्रवाल, चेतेश्वर पुजारा (उपकप्तान), शुबमन गिल, श्रेयस ऐयर, सूर्यकुमार यादव, ऋद्धिमन शाह (विकेटकिपर), रवीन्द्र जडेजा, रविचन्द्रन आश्विन, अक्सर पटेल, जयन्द यादव, इशान्त शर्मा, उमेशकुमार यादव, मोहम्मद सिराज र प्रसिद्ध कृष्ण ।