नेपाली चेलिहरुको चमत्कारी प्रदर्शन, ३.३ ओभरमै खेल जितेपछि सबै चकित


क्रिकेट

काठमाडौं, मंसिर ९ : आइसिसी टी-२० महिला विश्वकपअन्तर्गत एसिया छनोटमा नेपालले सानदार जित हात पारेको छ। दोस्रो जित निकाल्ने क्रममा नेपालले बिहीबार कुवेतलाई ९ विकेटको फराकिलो अन्तरले पराजित गरेको हो। कुवेतले दिएको २८ रनको झिनो लक्ष्य नेपालले १ विकेटको क्षतिमा ३.३ ओभरमा पूरा गर्दै उत्कृष्ट जित निकाल्यो।

नेपालका लागि कप्तान रुबिना क्षेत्रीले नटआउट १२ रन र इन्दू बर्माले नटआउट १३ रन जोडे। रुबिनाले १० बलमा १ चौका हिर्काउँदा इन्दूले ८ बलमा १ चौका प्रहार गरिन्। सीता रानामगर भने शून्यमा आउट भइन्। त्यसअघि दुबईको आइसिसी एकेडेमीमा टस जितेर पहिले ब्याटिङ गरेको कुवेतलाई नेपालले १५.४ ओभरमा २७ रनमै अलआउट गरेको थियो।

कुवेतका लागि प्रियदा मुरलीले सबैभन्दा बढी १० रन जोडिन्। अन्य ब्याटर दोहोरो अंकमा रन जोड्न नपाइ आउट भए। कुवेतका ओपनर जीफा जिलानीसहित ६ जना ब्याटर शून्यमै आउट भएका थिए। बलिङमा नेपालका संगिता राई र रुबिना क्षेत्रीले ३-३ विकेट लिए। करुणा भण्डारी र सरस्वती चौधरीले १-१ विकेट लिए।

संगिताले १६ ओभरको पहिलो, तेस्रो र चौथो बलमा विकेट लिएकी थिइन्। उनले २.४ ओभरमा २ रन मात्र खर्चिइन्। रुबिनाले ४ ओभरमा २ मेडन राख्दा ३ रन दिइन्। नेपालले प्रतियोगितामा दोस्रो जित हात पारेको हो। यसअघि नेपालले भुटानलाई ८ विकेटले पराजित गरेको थियो। पहिलो खेलमा भने हङकङसँग ६ विकेटले पराजित भएको थियो।

जितसँगै नेपालले ४ अंक जोडेर युएईसँग अंक बराबरी गरेको छ। अब भोलि मलेसिया र २८ नोभेम्बरमा युएईसँग खेल्नेछ। दुवै खेलमा जित हात पारे नेपाल विश्व छनोटमा पुग्ने बलियो सम्भावना हुनेछ। छनोटमा नेपालसहित घरेलु टोली युएई, भुटान, कुवेत, हङकङ र मलेसियाबीच प्रतिस्पर्धा भइरहेको छ। छनोटबाट एक टिम विश्व छनोटमा पुग्नेछ। छनोटअघि नेपालले कतारसँग ३ खेलको टी-२० सिरिज खेलेको थियो। सिरिज नेपालले क्लिनस्विप गरेको थियो।