पुबुदुलाई पन्छाएर फेरि भारतबाट यी कोच ल्याउने तयारीमा क्यान


क्रिकेट

काठमाडौं : भारतीय मोन्टी देसाई नेपाली राष्ट्रिय क्रिकेट टोलीको मुख्य प्रशिक्षक बन्ने सम्भावना बलियो छ। भारतीय नागरिक देसाई यसअघि नेपाली राष्ट्रिय क्रिकेट टोलीका ब्याटिङ कन्सल्ट्यान्ट थिए।

नेपालको मुख्य प्रशिक्षक बन्न ६० जनाले आवेदन दिएका थिए। नेपाल क्रिकेट संघ (क्यान) ले मुख्य प्रशिक्षकमा आवेदन दिएकामध्ये अन्तिम ५ जनाको अन्तर्वार्ता लिएको छ। आवेदन दिएका मध्ये १५ जना पहिलो चरणमा १५ जना छनोटमा परेका थिए। तीमध्ये प्रशिक्षक छनोट समितिले बुधबार ५ जनाको अन्तवार्ता लिएको हो।

क्यान स्रोतका अनुसार मोन्टी देसाई, पुबुदु दासानायके, अशंखा गुरुसिंहा, ग्रान्ट ब्राडवर्न र रुवान कल्पले अन्तर्वार्ता दिएका छन्। आवेदन परेकामध्येबाट देसाई नेपाल आउने सम्भावना उच्च रहेको क्यान स्रोतले जनाएको छ।

देसाईले नेपालसहित अफगानिस्तान, यूएई, क्यानडा, इन्डियन प्रिमियर लिग (आईपीएल) टोली गुजरात लायन्स, राजस्थान रोयल्स र भारतीय घरेलु क्रिकेटमा आन्द्र प्रदेशलाई प्रशिक्षण दिइसकेका छन्। सन् २०१४ को विश्वकपमा पनि देसाई नेपाली टोलीमा आबद्ध थिए।

सन् २०१५ मा क्यान निलम्बनमा हुँदा आयरल्यान्ड र स्कटल्यान्डमा भएको विश्वकप टी-२० छनोटमा देसाई नेपाली टोलीसँगै थिए। सन् २०१७ मा नेपाली यू-१९ टोलीले भारतलाई हराउँदा उनी नेपालका ब्याटिङ कन्सल्ट्यान्ट थिए।

देसाई अहिले वेष्ट इन्डिजका ब्याटिङ प्रशिक्षक छन्। वेष्ट इण्डिजसँगको सम्झौता सकिएपछि देसाई नेपाल आउने चर्चा छ। नेपाली क्रिकेटलाई नजिकबाट नियालेका देसाईले नेपालको ब्याटिङ लाईन सुधार गर्ने अपेक्षा गरिएको छ।