१ हजार करोड कमाउने चौथो फिल्म बन्यो ‘केजीएफ च्याप्टर २’


मनोरन्जन

एजेन्सी । दक्षिण भारतीय फिल्म ‘केजीएफ च्याप्टर २’ ले विश्वभरबाट १ हजार करोड भारतीय रुपैयाँ कमाइ गरेको छ । यो फिल्म १ हजार करोड कमाउने चौथो फिल्म बनेको छ ।भारतीय फिल्महरूलाई २० देखि ३० करोड भारतीय रुपैयाँ कमाउन मुश्किल परिरहेको समयमा दक्षिण भारतका सुपरस्टार यशद्वारा अभिनित ‘केजीएफ २’ ले १६ दिनमा १ हजार करोड भारतीय रुपैयाँ कमाइ गरेको भारतीय सञ्चार माध्यमले जनाएका छन् ।


१ हजार करोड भारतीय रुपैयाँ कमाउने फिल्म बाहुबली २, आरआरआर, दंगल र केजीएफ २ रहेका छन् । यी ४ फिल्म मध्ये दंगल बलीउड फिल्म रहेको छ भने अन्य ३ दक्षिण भारतीय फिल्म रहेका छन् ।

पछिल्लो समय दक्षिण भारतीय फिल्मले लगातार कीर्तिमान कायम गरेको छ । २५ मार्चमा रिलिज भएको दक्षिण भारतीय फिल्म ‘आरआरआर’ ले पनि पहिलो दिनमा नै कूल २ सय ५७ करोड भारतीय रुपैयाँ कमाएर यो वर्षको सबैभन्दा ठूलो ओपनिङ गरेको थियो ।

प्रशान्त नीलको निर्देशनमा ‘केजीएफ च्याप्टर २’ मा यश, संजय दत्त, रविना टण्डन र श्रीनिधि शेट्टीको मुख्य भूमिका छ । सन् २०१८ मा रिलिज भएको फिल्म केजीएफको पहिलो भाग उक्त समयको कन्नड उद्योगको सबैभन्दा बढी कमाई गर्ने फिल्म बनेको थयो ।