युवतिमाझ लोकप्रिय गायक स्वप्न सुमनले गरे आफ्नी प्रेमिका ज्योत्सना योगीसँग बिहे ( फोटो फिचर )


मनोरन्जन

काठमाडौं । फ्यानहरुलाई सरप्राइज दिँदै गायक स्वप्न सुमनले दुई दिनअघि आफ्नी प्रेमिका ज्योत्सना योगीसँग लगनगाँठो कसेका छन् । कमलपोखरीको एउटा होटलमा आयोजित सानो समारोहमा परम्परागत तवरबाट उनीहरुले लगनगाँठो कसेका थिए । ज्योत्सनाले बिहीवार सामाजिक सञ्जालमा विवाहका तस्विरहरु शेयर गर्दै स्वप्न सुमनसँग विवाह गरेको जानकारी गराएकी हुन् ।


ज्योत्सना र स्वप्नले तीन वर्ष लामो प्रेम सम्बन्धलाई विवाहमा परिणत गरेका हुन् । एक म्यूजिक भिडियोमा सँगै काम गर्ने क्रममा उनीहरुबीच प्रेम अंकुराएको थियो । स्वप्नको आवाजमा रहेको ‘तिम्रो र मेरो कुरा’ गीतमा उनीहरुले एकसाथ काम गरेका थिए । त्यस्तै, यो जोडीले ‘लभ क्लोअप’ सिरिजमा पनि अभिनय गरेको छ । दर्शकहरुले उनीहरुको जोडीलाई निकै रुचाउने गरेका छन् ।

ज्योत्सना योगीले अभिनेत्री सुस्मिता बम्जनले निर्माण गरेको फिल्म ‘म त तिम्रै हुँ’बाट अभिनेत्रीको रुपमा डेब्यू गरेकी थिइन् । तर, उनलाई पहिलो गाँसमैै ढुंगा लाग्यो । पछि उनले फिल्म ‘मायाङ्क’ साइन गरेकी थिइन् । तर, यो फिल्म निमाणकै क्रममा रोकियो । त्यसयता उनले नयाँ फिल्म साइन गरेको जानकारीमा छैन । उनी बेला-बखतमा म्यूजिक भिडियोमा भने देखिने गरेकी हुन्छिन् । त्यस्तै युवायुवतीहरुमाझ अत्यधिक क्रेज भएका गायक हुन् स्वप्न सुमन । युट्यूवबाट चर्चामा आएका उनले छोटो समयमा लोभलाग्दो फ्यान फलोइङ कमाए ।

स्वप्नको ‘कसरी भनुँ’ बोलको गीत सर्वाधिक हिट छ । ५ वर्षअघि युट्यूवमा रिलिज भएको यो गीतको लिरिकल भिडियोले अविश्वसनीयरुपमा ५ करोड २० लाख भ्यूज बटुलेको छ । कुनै पनि नेपाली गीतको लिरिकल भिडियोले पाएको सम्भवत यो सर्वाधिक भ्युज हो । यस्तै ‘म तिम्रो’ बोलको गीतले पनि २ करोड भन्दा बढी भ्यूज पाएको थियो । स्वप्नले सन् २०१२ बाट संगीत करिअर सुरु गरेका हुन् ।