आजबाट हलमा ‘कबड्डी ४, द फाइनल म्याच’


मनोरन्जन

काठमाडौं । रामबाबु गुरुङले निर्देशन गरेको फिल्म ‘कबड्डी ४: द फाइनल म्याच’ आज शुक्रबारदेखि प्रदर्शन हुने भएको छ। देशभरका एक सय ९० हलमा एकसाथ प्रदर्शन हुन लागेको फिल्मको देशभर नै बुकिङ उच्च छ। नेपालको सबैभन्दा ठूलो मल्टिप्लेक्स चेन क्यूएफएक्समा फिल्मले सर्वाधिक शोज प्राप्त गर्दै रेकर्ड नै बनाएको छ।

क्यूएफएक्सले काठमाडौंभित्र र मोफसलका ११ वटा हलमा फिल्मलाई ९२ शो दिएको छ। नेपाली र विदेशी फिल्मले आजसम्म पाएको शोमध्ये यो सर्वाधिक हो। फिल्मले पाएको प्रायः शो ‘फिलिङ फास्ट’ मोडमा छन् भने केही शो `सोल्डआउट´ नै भइसकेका छन्। त्यसैले फिल्मले पहिलो दिन मै आक्रमक व्यापार गर्ने अनुमान लगाउन सकिन्छ।

समाजिक कथावस्तुलाई कमेडीमार्फत प्रस्तुत गरिएको फिल्ममा दयाहाङ राई, सौगात मल्ल, मिरुना मगर, गौमाया गुरुङ, बुद्धि तामाङ, विजय बराल, कमलमणि नेपाल, पुष्कर गुरुङ, कविता आले, जयनन्द लामा, प्रकाश घिमिरे, माओत्से गुरुङ, शरद अधिकारी लगायतका कलाकारको अभिनय छ।

बाँसुरी फिल्मस् र सुष्मा प्रोडक्सको प्रस्तुतिमा तयार भएको फिल्ममा शैलेन्द्र डी कार्कीको छायांकन, निमेष श्रेष्ठको सम्पादन, कालीप्रसाद बाँस्कोटा, एसडी योगी, अनुपम शर्माको संगीत, रामबाबु गुरुङ र उपेन्द्र सुब्बाको लेखन छ। फिल्मका निर्माता विशाल गुरुङ, सुष्मा गुरुङ, मधु मिजार र मणिराम पोखरेल हुन् ।