काठमाडौं । ब्राजिलका महान् फुटबलर पेलेको स्वास्थ्य अवस्था थप जटिल बन्दै गएको छ । क्यान्सर फैलिएसँगै स्वास्थ्य अवस्था जटिल बन्दै गएको अस्पतालले जनाएको छ । ८२ वर्षीय पेले तीन हप्तादेखि अस्पतालमा उपचाररत छन् । पेलेकी छोरीले सामाजिक सञ्जालमा पेलेले क्रिसमस अस्पतालमै मनाउने जानकारी दिएकी छिन् । ‘हाम्रो क्रिसमस घरबाट सरेको छ, उनले इन्स्टाग्राममा लेखेकी छिन् ।
यस्तै, इजरियलिटा अलबर्ट इन्सटेइन अस्पतालका अनुसार पेलेको क्यान्सर फैलिएको छ । र, उनको मिर्गौला र हृदय रोगको विशेष हेरचाह गर्नुपर्नेछ । सेप्टेम्बर २०२१मा पेलेको पेटमा ट्युमरको अप्रेसन गरेर फालिएको थियो । त्यसयता उनको नियमित उपचार भइरहेको छ ।
पेले ब्राजिलका लागि सबैभन्दा धेरै गोल गर्ने खेलाडी हुन् । उनको नाममा ९२ खेलमा ७७ गोल रहेको छ । हालै कतारमा सम्पन्न फिफा विश्वकप २०२२ मा नेइमारले उनको नाममा रहेको सर्वाधिक गोलको कीर्तिमान बराबर गरेका छन् । पेलेले ब्राजिलबाट सन् १९५८, १९६२ र १९७० गरी तीन पटक विश्वकप जितेका छन् ।
