मुम्बई : बलिउड अभिनेत्री तुनिशा शर्माले मुम्बईमा आत्महत्या गरेकी छिन् । २० वर्षीया यी अभिनेत्रीले शनिवार साँझ आफ्नो टेलिभिजन कार्यक्रम ‘अली बाबाः दास्तान–ए–काबुल’ को सेटमै आत्महत्या गरेकी हुन् । पछिल्ला समय यही कार्यक्रममा काम गरिरहेकी शर्मा मुम्बईमा यही कार्यक्रमको सेटमा छायांकनका लागि गएकी थिइन् । शोका प्राविधिक तथा कलाकारहरु आ–आफ्नो कार्यमा व्यस्त भैरहेको बेला उनले कोठा भित्र गएर फाँसी लगाएकी हुन् । लगत्तै उनको निधन भएको प्रहरीले जनाएको छ ।
तुनिशाले ‘फितूर’ तथा ‘बार बार देखो’ जस्ता फिल्ममा अभिनेत्री कट्रीना कैफको किशोरावस्थाको भूमिका निर्वाह गरेकी थिइन् । उनले इन्टरनेल वाला लभ, इश्क सुभानल्लाह तथा गायब जस्ता टेलिभिजन कार्यक्रममा पनि काम गरिसकेकी छिन् । उनले फिल्म कहानी २ मा विद्या वालनसंग पनि काम गरेकी थिइन् ।
तुनिशाले आत्महत्या गर्नुभन्दा करिब छ घण्टाअघि इन्स्टाग्राममा आफ्नो अन्तिम पोस्ट शेयर गरेकी थिइन् । शनिवार बिहान उनले इन्स्टाग्राममा एउटा तस्बिर शेयर गरेकी थिइन् । तस्बिरमा उनी फोनमा केही गरिरहेको देखिएको छ, जसमा उनले लेखेकी छिन्–‘जो आफ्नो प्यासनद्वारा अगाडि बढिरहेको हुन्छ, उ रोकिँदैन ।’ मुम्बई प्रहरीे जनाए अनुसार टेलिभिजन अभिनेत्री तुनिशा शर्माले टेलिभिजन सीरियलको सेटमै फाँसी लगाएर आत्महत्या गरेकी हुन् । उनलाई अस्पताल लगिएको थियो, जहाँ मृत घोषित गरियो ।
