काठमाडौं । सेलिब्रेटी बैंकरको परिचय बनाएकी रविना देशराज श्रेष्ठले आफ्नो प्रेमीको फोटो सार्वजनिक गरेकी छन् ।मेगा बैंकको कायममुकायम कार्यकारी अधिकृतबाट राजीनामा दिएको एकसातापछि इन्टाग्राममार्फत उनले आफ्नो प्रेमीको फोटो सार्वजनिक गरेकी हुन् ।
उनले इन्टाग्राममा ३२ वर्षको बैंकिङ करिअरबाट बाहिरिएपछि आफ्नो प्रेमीलाई चिनाउन पाउँदा खुसी भएको बताएकी छन् । उनले भेटपछि ‘कसरी माया बस्यो त्यो व्यक्त गर्न नसक्ने’ भन्दै सबैलाई शुभकामना र आर्शीवाद दिन अनुरोध गरेकी छन् । रवीनाले प्रेमी स्टुआर्ट अलेक्जेन्डर च्याप्म्यानको इन्स्टाग्राममा मेन्सन गर्दै ‘आई लभ यू’ लेखेकी छन् ।
रविना बैंकिङ क्षेत्रमा उच्च व्यवस्थापनमा पुग्ने सीमित नेपाली महिलामा पर्छिन् । रविनाले स्टाण्डर्ड चार्टर्ड बैंकबाट बैंकिङ करिअर सुरु गरेकी थिइन् । उनी नबिल बैंक हुँदै मेगा बैंकमा स्थापनाकालदेखि कार्यरत थिइन् ।मेगा बैंक नेपाल इन्भेस्टमेन्ट बैंकसँग मर्जरमा जाने भएपछि रविना इन्भेस्टमेन्टमा डेपुटी सीईओ हुने सहमति भएको थियो ।
तर, उनले ठूलो बैंकको डेपुटी सीईओको पद अस्वीकार गर्दै राजीनामा दिएकी थिइन् । रविनाका दुई छोरा आयुशमान र असिरमान छन् । लामो समयदेखि रविना एकल जीवन बिताउँदै आएकी थिइन् । दुवै छोरा नेपाली सिनेमा क्षेत्रमा सक्रिय छन् ।रविनाका छोरा आयुशमानले नायिका प्रिंयका कार्कीसँग विवाह गरेका छन् ।
