काठमाडौं । गायिका समीक्षा अधिकारीले आफूलाई हेपिएको भन्दै आक्रोश पोखेकी छन्। सोमबार सामाजिक सञ्जालमार्फत उनले आफूविरुद्ध अपशब्द बोलिएको बताएकी छन्। उनले कसैको नाम नतोकी आफ्नाविरुद्ध कुरा काट्ने धेरै जना रहेको उल्लेख गरेकी छन्। नबोली बस्दा हेपिरहने भएकाले आफूले यस विषयमा बोलेको समीक्षाको भनाइ छ।
‘कसैलाई मेरो गीत सुन्नु छैन भने नसुन र मलाई पनि तिम्रो अपशब्द सुन्नु छैन। तिम्रो के खाएकी छु मैले, तिमीले मलाई अपशब्द भन्ने के हक र साइनो छ’, उनले भनेकी छन्, ‘एउटी दीदीले भन्नुहुन्थ्यो– जाँड खाएर कुट्ने लोग्नेसँग जाँडै खाएर लड्नुपर्छ, यो कुरा मलाई पनि ठीकै लाग्छ। नबोले त यहाँ हेप्छन्, घस्यौटाहरू मनलागी उड्छन्।’ यस क्रममा उनले सानो उमेरमा छोरी मान्छे बहकिने र ठीक–बेठीक छु्ट्याउन नसक्दा गलत बाटोमा लाग्न पनि सक्ने भावुक कुरा पनि गरेकी छन्। यो वास्तविकता समाजले बुझ्नुपर्ने उनको भनाइ छ।
‘सानो उमेरमा छोरी मान्छे बहकिन्छन्, राम्रो/नराम्रो छुट्याउन जान्दैनन्। मान्छेका जालझेल बुझ्दैनन्। भविष्यको बारेमा निर्णय गर्न जान्दैनन्’, समीक्षाले लेखेकी छन्, ‘देश कस्ता कानुनमा जेलिएको छ भन्ने उनीहरूलाई थाहा हुँदैन। सपनाको दुनियाँमा अगाडि बढ्दा गलत बाटोमा पनि पर्न सक्छन्, समाजले अभिभावकले यो बुझ्नुपर्छ।’
उनले मान्छे तीन किसिमका हुने उल्लेख गरेकी छन्। उनका अनुसार एउटा ठूलै विद्वान्ले भनेका रैछन् मान्छे तीन किसिमका हुन्छन्। उच्च स्तरको त्यो हो, जसले विचार र सिद्धान्तका कुरा गर्छ, व्यक्तिको होइन, व्यक्तित्वको कुरा गर्छ। मध्यम स्तरका ती हुन्, जसले घटनाको कुरा गर्छन्, जस्तै : गाडी लड्यो, अन्डा फुट्यो।
उनले अगाडि लेखेकी छन्, ‘अनि जो व्यक्तिको बारेमा कुरा गर्छ, अरूको कुरा काट्छ त्यो तल्लो स्तरको अर्थात् घटिया हुन्छ। यी रुख होइनन्, फल र फूल पनि होइनन्, पात हुन्, खसेर घस्यौटा बन्ने र जता हावा लाग्छ उतै उड्ने। यहाँ अरूको कुरा काट्ने यस्ता घस्यौटा धेरै छन्।’
यस्तो छ उनको स्टाटस:
एउटा ठूलै विद्वान्ले भनेका रैछन् मान्छे तीन किसीमका हुन्छन्। उच्च स्तरको त्यो हो, जसले विचार र सिद्धान्तका कुरा गर्छ, व्यक्तिको होइन, व्यक्तित्वको कुरा गर्छ। मध्यम स्तरका ती हुन्, जसले घटनाको कुरा गर्छन्, जस्तै : गाडी लड्यो, अन्डा फुट्यो। अनि जो व्यक्तिको बारेमा कुरा गर्छ, अरूको कुरा काट्छ त्यो तल्लो स्तरको अर्थात् घटिया हुन्छ। यी रुख होइनन्, फल र फूल पनि होइनन्, पात हुन्, खसेर घस्यौटा बन्ने र जता हावा लाग्छ उतै उड्ने। यहाँ अरूको कुरा काट्ने यस्ता घस्यौटा धेरै छन्।
सानो उमेरमा छोरी मान्छे बहकिन्छन्, राम्रो/नराम्रो छुट्याउन जान्दैनन्। मान्छेका जालझेल बुझ्दैनन्। भविष्यको बारेमा निर्णय गर्न जान्दैनन्। देश कस्ता कानुनमा जेलिएको छ भन्ने उनीहरूलाई थाहा हुँदैन। सपनाको दुनियाँमा अगाडि बढ्दा गलत बाटोमा पनि पर्न सक्छन्, समाजले अभिभावकले यो बुझ्नुपर्छ।
म गायिका हुन जन्मेकी हुँ। स्वरले साथ दिँदासम्म गाउँछु, कसैले मेरो गीत नसुनोस्, कसैले मलाई अवसर नदेओस् म एक्लै कोठामा गाउँछु, एकान्तमा गाउँछु, आफ्नै युट्युब च्यानलमा गाउँछु, मलाई माया गर्ने पनि हुनुहुन्छ।
कसैलाई मेरो गीत सुन्नु छैन भने नसुन र मलाई पनि तिम्रो अपशब्द सुन्नु छैन। तिम्रो के खाएकी छु मैले, तिमीले मलाई अपशब्द भन्ने के हक र साइनो छ?
हुन त हिउँदका कठ्याङ्ग्रिदा दिनमा घसौटा बटुलेर आगो ताप्नुपर्दो रहेछ। एउटी दीदीले भन्नुहुन्थ्यो– जाँड खाएर कुट्ने लोग्नेसँग जाँडै खाएर लड्नुपर्छ, यो कुरा मलाई पनि ठीकै लाग्छ। नबोले त यहाँ हेप्छन्, घस्यौटाहरू मनलागी उड्छन्।
