बुटवल : तीन वर्षमा सक्ने भनिएको नारायणगढ बुटवल सडक विस्तारको काम ४ बर्ष भैसक्दापनि मुस्कीलले २६ प्रतिशत मात्र सकिएको छ । बाँकी काम सक्न थपिएको एक वर्षमा २ प्रतिशत मात्र काम गरेको चाइनिज कम्पनी चाइना स्टेट इन्जिनियरिङ कर्पोरेशनले अहिले काम नै रोकेर पुनः डेढ वर्ष म्याद थप्न सडक विभागसंग लबिङ गरिरहेको छ ।
सुरुमा कोरोनाको कारण देखाएर निर्माण कम्पनीले निकै सुस्त गतिमा काम गरेको थियो । कोरोनापछि पनि कामको गति बढ्न सकेको छैन् । यहि गतिमा काम हुदा अबको १२ वर्षमा पनि कम्पनीले काम सक्नेमा स्थानियको आशंका छ । चाइनिज ठेकेदार कम्पनी सामु नियामक निकाय मौन र निरिह रहंदै आएकोमा स्थानिय आजित छन् । सडकमा सम्झौता अनुसार काम नहुँदा सडकमा खाल्डो, धुवाधुलो र डाईभर्सनले स्थानीयले सास्ती खेप्नुपरेको छ ।
पटक–पटक कोरोना कहर, नदीजन्य पदार्थको अभाव, रूख कटान र बिजुलीको पोल समयमा नसार्दा काम ढिलो भएको चिनियाँ ठेकेदार कम्पनीका कन्सल्टयान्ट राकेश झाले बताए । नारायणगढ बुटवल सडकमार्ग गैडाकोट देखी दाउन्ने डाँडा र दाउन्ने डाँडा देखी बुटवल सम्म गरि १ सय १४ किलोमिटर दुरीको दुई खण्ड गरेर काम हुदैँछ । पूर्वी खण्डमा अहिलेसम्म ६ किलोमिटर मात्र ग्राभेल सम्पन्न भएको छ ।
चिनियाँ ठेकेदार कम्पनी चाइना स्टेट इन्जिनियरिङ कर्पोरेसनले करिब १७ अर्बमा ठेक्का लिएको यस राजमार्गको शिलन्यास २०७५ चैत ८ मा तत्कालीन प्रधानमन्त्री केपी शर्मा ओलीले गरेका थिए । बस्ती क्षेत्रमा ६ लेन, जङ्गल क्षेत्रमा ४ लेन र दाउन्ने क्षेत्रमा ३ लेनको हुनेगरी सडक बिस्तार गरिने भएपनि सुस्त गतिमा काम हुँदा स्थानीय र सवारीयात्रीलाई प्रत्यक्ष असर परेको छ ।
