काठमाडौं : प्रधानमन्त्री पुष्पकमल दाहाल ‘प्रचण्ड’ले राम्रो काम गरेकोले त्यसलाई देख्न नसक्नेहरु गठबन्धन भित्र खेल्ने प्रयास स्वरुप कोशीमा राजनीतिक घटनाक्रमहरु विकसित भएको टिप्पणी गरेका छन्। भरतपुर महानगरपालिका अन्तर्गत ३ वटा खानेपानी आयोजनाहरुको समुद्घाटन कार्यक्रमा बोल्दै प्रधानमन्त्री प्रचण्डले उक्त कुरा बताएका हुन्।
‘कोशी प्रदेशमा जे राजनीतिक परिदृश्य तपाईंहरुले पनि देख्नुभयो होला। यही गठबन्धनले राम्रो गरेको सहन नसकेर एकथरी मान्छे यहाँभित्र खेल्न सकिन्छ कि भनेर, विभाजन ल्याउन सकिन्छ भन्ने योजना अन्तर्गत ती कामहरु थिए,’ प्रचण्डले भने।
प्रधानमन्त्री प्रचण्डले उक्त षडयन्त्रहरुलाई निस्तेज पारेको पनि उल्लेख गरेका छन्। ‘हिजो तपाईंहरुले थाहा पनि पाइसक्नु भएको छ कि कांग्रेस सभापति शेरबहादुर देउवा, प्रधानमन्त्रीको हिसाबले म आफैं र कांग्रेसका नेता शेखर कोइाराला बसेर त्यो षडयन्त्र निस्तेज पारिएको छ,’ उनले भने।
