काठमाडौं । नेपालले यूएईलाई १९ रनले हराउँदै यू-१९ प्रिमियर कपको उपाधि जितेको छ । मलेसियाको क्वालालाम्पुरस्थित बायोमास ओभलमा भएको खेलमा डकवर्थ लुइस मेथडमा १९८ रनको लक्ष्य पाएको यूएईले २६.५ ओभरमा अलआउट हुँदै १७८ रनमात्रै बनाएपछि नेपाल १९ रनले विजयी भएको हो ।
मलेसियाको क्वालालम्पुरस्थित बायोमास ओभल रङ्गशाला टस जितेर पहिले ब्याटिङ गरेको नेपालले निर्धारित ५० ओभरमा ८ विकेट गुमाएर २८० रन बनायो। नेपालका लागि कप्तान देव खनालले सर्वाधिक १०० रन बनाए। यस्तै, उत्तम रंगु थापामगरले ५७ तथा अर्जुन कुमालले ५५ रन बनाए।
दीपक प्रसाद डुम्रेले २८ तथा दीपेश कँडेलले नटआउट १० रन बनाए। नेपालविरुद्ध यूएईका हरित शेट्टी एक्लैले ५ विकेट लिए। यस्तै, आयन अफजल खानले २ तथा अम्मर बदामीले १ विकेट लिए।
