जनकपुरधाम । प्रहरीले सर्लाही र रौतहटबाट पेस्तोलसहित दुईजनालाई पक्राउ गरेको छ। पक्राउ पर्नेमा सर्लाहीको लालबन्दी नगरपालिका १५ बोरे डाँडा बस्ने ५० वर्षीय रामलाल मोक्तान र भारतको बिहार राज्य जिल्ला सितामढी बैरगनिया ३ असोगी बस्ने २१ वर्षीय राहुल राम रहेको मधेस प्रदेश प्रहरी कार्यालय, जनकपुरधामले जनाएको छ।
प्रहरीले दुईजनालाई सर्लाही र रौतहटबाट पेस्तोलसहित पक्राउ गरिएको प्रहरी प्रवक्ता प्रहरी उपरीक्षक सुबास चन्द्र बोहराले जानकारी दिए।
सोमबार राति साढे १२ बजेको समयमा मधेस प्रदेश प्रहरी कार्यालय जनकपुरधामको समन्वय तथा इलाका प्रहरी कार्यालय लालबन्दीबाट खटिएको प्रहरी टोलीले मोक्तानको घरमा खानतलासी गर्दा इन युएसए लेखिएको रिभलवर १ थान बरामद गरेको हो।
यस्तै, राति साढे १२ बजे नै रौतहटको गौर नगरपालिका २ महादेवपट्टी स्थित सशस्त्र प्रहरी बल, नेपाल नं। ११ गण हेडक्वाटर रौतहटको सशस्त्र प्रहरी बल, नेपाल प्रस्तावित सीमा सुरक्षा गुल्म गौरबाट खटिएको चेकप्वाईन्ट डिउटी टोलीले भारतबाट नेपाल तर्फ आउँदै गरेको रामलाई एकथान कटुवा पेस्तोलसहित नियन्त्रणमा लिएको प्रवक्ता बोहराले जानकारी दिए।
यस सम्बन्धमा थप अनुसन्धान भइरहेको मधेस प्रदेश प्रहरी कार्यालय, जनकपुरधामले जनाएको छ।
