काठमाडाैं : पल शाहका पुर्व म्यानेजर कृष्ण जोशीले आफूलाई नकावधारीहरूले डेरामै आएर ज्यान मार्ने धम्की दिएको भन्दै जिल्ला प्रशासन कार्यालय काठमाडौमा शान्ति सुरक्षाको निवेदन दिएका छन् । गएको असोज १८ गते राति साढे १० बजेतिर काठमाडौको शान्तिनगरस्थित आफ्नो डेरामै आएर नकावधारीहरूले ज्यान मार्ने धम्की दिए पनि प्रहरीले अनुसन्धान नगरिदिएपछि उनले प्रशासन कार्यालयमा निवेदन दिएका हुन् ।
यस्तो थियो घटना
गएको असोज १८ गते कृष्ण जोशीलाई एक अनजान महिलाले गीत रेकर्डिङको बहानामा फोन गर्छिन्। त्यसपछि प्रहरी नम्बरबाट जोशीलाई लेनदेनको विषयमा सोधपुछ गरिन्छ। त्यसै राति उनको डेरामा नकावधारीहरू आएर ज्यान मार्ने धम्की दिन्छन्, तर उनी लुकेर बच्छन्।
जोशीले भोलिपल्ट प्रहरीलाई रिपोर्ट गर्छन् र थाहा पाउँछन् कि प्रहरी अधिकृत महेश बडूले ती महिलाको आग्रहमा फोन गरेका थिए। पछि अनुसन्धान गर्दा महिलाले नै नकावधारीहरू पठाएको स्विकार गरेको स्रोत बताउछ। जोशी प्रहरी अनुसन्धानमा ढिलाइ भएपछि प्रशासन कार्यालयमा न्यायको लागि निवेदन दिन पुग्छन्।
कुनै बेला पल शाहको म्यानेजर रूपमा जोशीले काम गरेका थिए । तर, पल बलात्कार प्रकरणमा मुछिएसँगै जोशीसँग उनको सम्बन्ध बिग्रेको थियो । ‘त्यही कारण पनि ममाथि अपराध हुन थालेको हो कि ? यसबारे अनुसन्धानपछि थाहा होला,’ जोशीले भने । जोशीको यो भनाईमा बल पुग्ने गरि पल शाहले तिनै घम्की दिएको आरोप लागेकी महिलालाई आफ्नो फेसबुकमा मेरो दिदीलाई जन्मदिनको शुभकामना भनेर फोटो सहित पोष्ट गरेका छन् ।
