काठमाडाैं : फिल्म पिताम्बर को नयाँ गीत म त फ्यान भएँ युट्युबमार्फत सार्वजनिक गरिएको छ। मंगलबार राजधानीमा आयोजित एक कार्यक्रमका बीच गीत सार्वजनिक गरिएको हो। आशिष अविरल र अस्मिता अधिकारीको आवाज रहेको यस गीतमा आनन्द अधिकारीको शब्द तथा अविरलकै संगीत छ।
गीतको छायांकनका लागि तराईको सेट तयार पारिएको थियो, जसमा अभिनेता प्रदीप खड्का र दिव्या रायमाझी मुख्य भूमिकामा देखिएका छन्। राधाकृष्णको जोडीको रूपमा प्रस्तुत गरिएको गीतमा कविराज गहतराजको नृत्य निर्देशन रहेको छ। आकर्षक कोरियोग्राफी र कलात्मक सेट डिजाइनका कारण दृश्यलाई झन् प्रभावशाली बनाइएको छ। १०० भन्दा बढी कोरस कलाकार सहभागी रहेको यस गीतमा पहिलो पटक प्रदीप खड्कालाई कोरससँगै नृत्य गराइएको छ।
‘पिताम्बर’ फिल्मका निर्माता विशाल चौलागाईंका अनुसार गीतका लागि भारतबाट विशेष सेटसहित प्राविधिक टोली ल्याइएको थियो। ‘फिल्मको कथा तराईसँग सम्बन्धित भएकाले त्यहाँकै वातावरणअनुसार सेट निर्माण गरिएको हो,’ उनले भने। फिल्ममा प्रमोद अग्रहरि, सुपुष्पा भट्ट, दिव्यदेव, आध्या लामिछाने र सुप्रोल बुढाथोकीको पनि अभिनय छ।
केपी फिल्मस् र पुरुषोत्तम प्रधान फिल्मस्को ब्यानरमा निर्माण भएको पिताम्बर लाई कृषा चौलागाईंले निर्देशन गरेकी हुन्। यसअघि ‘इन्साफ’, ‘कसम हजुरको’, ‘के म तिम्रो साथी बन्न सक्छु’ र ‘पलास’ निर्देशन गरिसकेकी चौलागाईंको यो नयाँ प्रस्तुति पिताम्बर चैत २९ गते प्रदर्शनको तयारीमा छ।
\
