काठमाडौं । हरिवंश आचार्य मुख्य भूमिकामा रहेको चलचित्र ‘भूठान’को टिजर सार्वजनिक भएको छ ।
ओएसआर डिजिटलबाट सार्वजनिक भएको टिजरमा हरिवंश अमेरिका लगिएका भुटानी आप्रवासीको भूमिकामा देखिएका छन् । उनलाई आफ्नो देश फर्कन खोजेको तर नपाएर विक्षिप्त बनेको मानसिक रोगीको रूपमा देखाइएको छ ।
टिजरमा दयाहाङ राई र जोयश पाण्डे दाजुभाइ रहेको र बाबुको शवलाई जलाउने कि गाड्ने भनेर विवाद गरिरहेको देखिन्छ । हलिउडको साग अफट्रा अन्तर्गत रहेर बनेको यो पहिलो नेपाली चलचित्र हो जसमा हलिउडका केही प्राविधिकहरुले पनि काम गरेका छन् ।
विनोद पौडेलले चलचित्रलाई निर्देशन गरेका छन् । यस चलचित्रको प्रमुख निर्मातामा अविरल थापा, राजेन्द्र ठकुराठी, अमिताव जोशी, सुशांक मैनाली र किर्तना बाँस्कोटा छन् । कार्यकारी निर्मातामा विकाश भिटो अधिकार, कौशिला खनाल, रमेश भट्ट, अपार श्रेष्ठ, भुवन प्याकुरेल छन् । सहनिर्मातामा जोयस पाण्डे, प्रदीप शर्मा (बडाईं), राजु पौडेल, रविन पोखरेल र नवराज पराजुली छन् ।
चलचित्रमा सुसन प्रजापतिको छायांकन, अन्जय खड्काको सम्पादन, डिकेश खडगी शाहीको ध्वनी, सम्बरन प्रेथु राईको संगीत रहेको छ । चलचित्र वैशाख १२ गते प्रदर्शनमा आउनेछ । ‘भूठान’ शब्दले कुनै समय आफ्नो घर रहेको तर अहिले हराइसकेको स्थान भन्ने बुझाउने निर्माणपक्षले जनाएको छ ।
