काठमाडौं : अभिनेता विपिन कार्कीको मुख्य भूमिका रहेको एक्सन ड्रामा फिल्म ‘कर्मा’को टिजर सार्वजनिक भएको छ। करिब दुई मिनेट लामो टिजरले फिल्मको कथावस्तु, परिवेश र पात्रहरूको संक्षिप्त झलक प्रस्तुत गर्छ। फिल्ममा विपिन कार्कीलाई एक्सन अवतारमा देख्न सकिन्छ। गाउँको परिवेशमा आधारित कथाले एक घटनाले उनलाई बदलाको बाटोतर्फ धकेल्छ। त्यसपछि उनी ‘एंग्री यङ म्यान’को रूपमा प्रस्तुत भएका छन्।
टिजरमा विपिनको चरित्रलाई बहुआयामिक रूपमा देखाइएको छ। उनी आमालाई माया गर्ने र परिवारलाई पहिलो प्राथमिकता दिने संवेदनशील छोरा हुन्। तर, परिस्थितिले उनलाई विद्रोही बनाउँछ र बदलाको भावना जागृत हुन्छ। ‘नाका’पछि विपिन दोस्रो पटक एक्सन भूमिकामा देखिन लागेका हुन्। ‘नाका’मा उनले ग्याङस्टरको भूमिका निभाएका थिए, भने ‘कर्मा’मा उनी बदला खोज्ने पात्रको रूपमा प्रस्तुत भएका छन्।
टिजरमा विपिनसँगै मुकुन भुसाल, उपासना सिंह ठकुरी, सरिता गिरी, दिव्यदेव पन्त लगायतका कलाकारलाई फिचर गरिएको छ। एक्सन र ड्रामाको समिश्रणले टिजरलाई थप रोचक बनाएको छ। फिल्मलाई आर्टिस्टिक इन्टरटेनमेन्टको ब्यानरमा वसन्त लम्सालले निर्माण गरेका हुन्। पटकथा तथा निर्देशन सौरभ चौधरीले गरेका छन्, जसले यसअघि पुलिस थ्रिलर ‘अगस्त्य’ निर्देशन गरेका थिए।
