हेटौंडा :राष्ट्रिय प्रजातन्त्र पार्टी (राप्रपा) निकट राष्ट्रिय प्रजातान्त्रिक युवा संगठनले नेकपा माओवादी केन्द्रका अध्यक्ष एवं प्रधानमन्त्री पुष्पकमल दाहाल ‘प्रचण्ड’ को तस्वीर जलाएको छ।
शनिबार हेटौंडामा आयोजित संगठनको जिल्ला अधिवेशनका क्रममा अध्यक्ष प्रचण्डको तस्वीर जलाइएको हो। कार्यक्रममा राप्रपाका केन्द्रीय नेता तथा प्रतिनिधिसभा सदस्य दीपकबहादुर सिंहको उपस्थिति रहेको थियो।
युवा संगठनका सदस्य सचिव नीराजन बम पताँलाले प्रचण्डको तस्वीर जलाउँदै गणतन्त्र मुर्दावादको नारा लगाए। साथै, कार्यक्रममा उपस्थित समर्थकहरूलाई पनि ‘प्रचण्ड हत्यारा मुर्दावाद’ भन्ने नारा लगाउन प्रेरित गरेका थिए।
उनले मकवानपुरमा कार्यक्रम नभएको भए काठमाडौंमै तस्वीर जलाउने योजना रहेको खुलासा गरे। उनले प्रधानमन्त्री प्रचण्डलाई ‘हत्यारा’ भन्दै कडा आलोचना गरेका छन्।
यो घटना प्रधानमन्त्री दाहालले सिन्धुपाल्चोकमा आयोजित जनसभामा पूर्वराजालाई संविधानको दायराभित्र रहन सचेत गराउँदै ‘इँटको जवाफ पत्थरले दिने’ चेतावनी दिएको एक दिनपछि भएको हो। प्रचण्डको सो बयानलाई लिएर विभिन्न दलहरूले तीव्र प्रतिक्रिया जनाइरहेका छन्।
