काठमाडौं : प्राइम टाइम्स टेलिभिजनका पत्रकार ऋषि थपलिया ‘युवा पत्रकारिता पुरस्कार–२०८१’ बाट सम्मानित भएका छन्। पाँचौँ एपिक अवार्ड समारोहका अवसरमा प्रधानमन्त्री पत्नी राधिका शाक्यले थपलियालाई उक्त सम्मान प्रदान गरेकी हुन्।
थपलिया प्राइम टाइम्स टिभीबाट प्रसारण हुने लोकप्रिय टक शो ‘जनता जान्न चाहन्छन्’ का प्रोड्युसर तथा डाइरेक्टर हुन्। वरिष्ठ पत्रकार ऋषि धमलाले सञ्चालन गर्ने यस कार्यक्रममा थपलिया लामो समयदेखि पर्दा पछाडि रहेर कार्यक्रम निर्माण तथा निर्देशनको जिम्मेवारी सम्हाल्दै आएका छन्। पत्रकारितामा एक दशकभन्दा बढी समय बिताइसकेका उनले राजनीतिक, सामाजिक, आर्थिक र समसामयिक विषयमा कलम चलाउँदै समाजलाई सूचनामूलक जानकारी प्रदान गर्दै आएका छन्।
सम्मान पत्रमा थपलियाले टेलिभिजन कार्यक्रम प्रस्तोताका रूपमा पनि दर्शकमाझ लोकप्रियता कमाएको उल्लेख गर्दै पत्रकारिता क्षेत्रमा पुर्याएको योगदान अतुलनीय रहेको आयोजकको भनाइ छ।
थपलियाले यसअघि हिमालय टिभी, नेपाल आवाज म्यागजिन, एशिया सञ्चार, सूत्र न्यूज, क्यानडा नेपाल, नेपाली पत्रिका, नेपाली पब्लिक जस्ता विभिन्न सञ्चारमाध्यममा काम गरिसकेका छन्। लाइभ रिपोर्टिङ, कार्यक्रम सञ्चालन, निर्देशन तथा अन्तर्वार्तामार्फत समाजमा सकारात्मक प्रभाव पार्न उनी सक्षम मानिन्छन्।
भक्तपुरको मध्यपुर थिमि नगरपालिकास्थित निगुपुखुमा आयोजित विशेष कार्यक्रममा एपिक नेपाल म्युजिक प्रालिले आयोजना गरेको पाँचौँ एपिक अवार्ड समारोहमा विभिन्न क्षेत्रका प्रतिष्ठित व्यक्तित्वहरूलाई सम्मान गरिएको थियो।
