काठमाडौं : धरानका बासिन्दाले वर्षौंदेखि भोग्दै आएको खानेपानी समस्याको समाधान अब नजिकिँदै छ। प्रधानमन्त्री केपी शर्मा ओलीले धरानका जनतालाई सुरक्षित खानेपानी उपलब्ध गराउने प्रक्रियाको सुरुवात भइसकेको घोषणा गरेका छन्।
आज सिंहदरबारस्थित आफ्नै कार्यकक्षमा धरान उपमहानगरपालिकाका प्रमुख हर्कराज राईसहितको प्रतिनिधिमण्डलसँग भेट्दै प्रधानमन्त्री ओलीले भने, “धरानवासीले अब पिउन योग्य पानी पाउनु पर्छ। हामीले प्रक्रिया आजैबाट अघि बढाएका छौं। संघीय सरकारले बजेट र अन्य सहजीकरणको जिम्मा लिन्छ।” उनले थपे, “यो सन्देश धरानवासीसम्म पुर्याइदिनुहोस्।”
धरानको खानेपानी समस्या समाधानका लागि विस्तृत परियोजना प्रतिवेदन (DPR) संघीय सरकारबाट पहिल्यै तयार भइसकेको हो। नगर प्रमुख राईले खानेपानी आयोजना अगाडि बढाउन आवश्यक स्रोत सुनिश्चितताका लागि अर्थ मन्त्रालयमा निवेदन दिइसकेको जानकारी पनि गराए।
खानेपानी मात्र होइन, प्रधानमन्त्री ओलीले धरानको फोहोरमैला व्यवस्थापनमा पनि आधुनिकता ल्याउनु पर्ने धारणा राखे। उनले परम्परागत विधि होइन, नयाँ प्रविधियुक्त ‘ल्याण्डफिल्ड साइट’ निर्माण गर्नुपर्नेमा जोड दिए। यो पहलसँगै धरानको खानेपानी र सरसफाइका समस्या समाधानको दिशामा ठोस कदम चालिएको जनअपेक्षा छ।
