काठमाडौं : काठमाडौं महानगरपालिकामा आन्तरिक असमझदारी चुलिएको छ। हालै एक घटनालाई लिएर महानगरमा कार्यरत कर्मचारी र पेशागत संगठनहरू आक्रोशित बनेका छन्। उनीहरूले ११ बुँदे मागसहित नगर कार्यपालिकासमक्ष औपचारिक ज्ञापनपत्र बुझाएका छन्, जसको पहिलो बुँदै प्रशासनिक हलचलको केन्द्र बनेको छ।
प्रमुख प्रशासकीय अधिकृत सरोज गुरागाईंलाई कार्यालय छिर्न नदिने काममा संलग्न रहेको आरोप महानगर प्रहरी बलका प्रमुख राजु पाण्डेमाथि लागेको छ। चैत २१ गतेको यो घटनालाई ‘गम्भीर प्रशासनिक अपमान’को रूपमा चित्रित गर्दै कर्मचारी संगठनहरूले तीन दिनभित्र उच्चस्तरीय छानबिन समिति गठन गरी दोषीमाथि कारबाहीको माग गरेका छन्।
“महानगर प्रहरी प्रमुखले कार्यालय मर्यादा उल्लंघन गर्दै गैरकानुनी र अनुशासनहीन व्यवहार देखाए,” ज्ञापनपत्रमा उल्लेख छ। संगठनहरूले पाण्डेलाई तत्काल निलम्बनमा राख्न माग गर्दै छानबिन प्रक्रिया अवरोध नहोस् भन्ने चाहना व्यक्त गरेका छन्।
ज्ञापनपत्रमा स्थानीय तह कर्मचारी युनियन, स्थानीय तह कर्मचारी संघ, महानगर कर्मचारी परिषद, यातायात स्वतन्त्र मजदुर संगठन, र वातावरण तथा सरसफाइ श्रमिक संघका शीर्ष पदाधिकारीहरूको हस्ताक्षर रहेको छ।
यति मात्र होइन, उनीहरूले महानगरको समग्र प्रणालीमा नै सुधारको खाँचो औंल्याउँदै केही ‘गैरकानुनी संयन्त्रहरू’ खारेज गर्नुपर्ने माग समेत राखेका छन्। कानूनी प्रक्रियाबिना गठन गरिएका समिति तथा संस्थाले बाहिरका व्यक्तिलाई रोजगारी दिन खोजिएको दाबी गर्दै उनीहरूले यस्ता संरचनाको खारेजी माग गरेका हुन्।
संगठनहरूले मेयर बालेनप्रति सहकार्यको भावना व्यक्त गरे पनि, सचिवालयका केही सदस्य र सल्लाहकारहरूले कर्मचारीहरूप्रति गलत छवि बनाउने प्रयास गरेको आरोपसमेत लगाएका छन्।
यो घटनाले काठमाडौं महानगरको प्रशासनिक संयन्त्रमा गम्भीर असहजता उत्पन्न भएको संकेत गर्छ। अब मेयर र कार्यपालिकाले यसप्रति कस्तो प्रतिक्रिया दिनेछ भन्ने चासो झनै बढेको छ।
