काठमाडौं । अनेरास्ववियुका विद्यार्थी नेता हिमेश थापाले अनेरास्ववियुमा उमेर हदबन्दीको कडाइपूर्वक कार्यान्वयन आवश्यक रहेको बताएका छन्। उनले विद्यार्थी संगठनको नेतृत्वमा ३२ वर्षभन्दा माथिका व्यक्तिहरू रहनु संगठन र पार्टी दुबैको क्षतिमा जाने तर्क प्रस्तुत गर्दै, तत्काल पुस्तान्तरणमार्फत संगठनलाई पुनर्जीवित गर्नुपर्ने धारणा राखेका छन्।
थापाका अनुसार सामान्य शैक्षिक प्रगतिमा १६ वर्षको उमेरमा एसईई, १८ मा +२ र २२ वर्षसम्ममा स्नातक अध्ययन सकिने भएकाले, १६ देखि अधिकतम २५/२६ वर्षसम्मका विद्यार्थीहरू मात्रै अनेरास्ववियुमा नेतृत्वका लागि उपयुक्त हुन्छन्। “यस अवधिभित्रका विद्यार्थीहरू नै शैक्षिक र वैचारिक रूपले सबल रहन्छन्,” थापा ले बताए।
तर पछिल्लो समय ३२–४० वर्ष उमेरका व्यक्तिहरूले अनेरास्ववियुको नेतृत्व सम्हाल्दै आएकोप्रति चिन्ता व्यक्त गर्दै उनले भने, “यस्ता नेताहरू विद्यार्थी नभए पनि संगठनलाई राजनीतिक सीढी बनाउने प्रवृत्ति हावी भएको छ। यसले नयाँ पुस्ताको नेतृत्व विकास रोकेको छ, ऊर्जा र नवप्रवर्तन क्षमतामा ह्रास आएको छ।”
थापा ले अनेरास्ववियुको नेतृत्वमा ३२ वर्षको उमेर हदबन्दी तोक्नुपर्नेमा जोड दिँदै भने, “३२ वर्ष नाघेपछि सम्बन्धित व्यक्ति पार्टीको अन्य संरचनामा परिचालित हुनुपर्छ। यसले संगठनलाई अनुशासित, प्रगतिशील र जनअनुकुल बनाउँछ।”
उनको विश्वास छ, “अहिले नै पुस्तान्तरणको नीति लागू गरेर अनेरास्ववियुलाई सशक्त बनाइयो भने समाजमा एमालेप्रतिको आकर्षण पुनः बढ्नेछ र २०८४ को निर्वाचनमा एमालेलाई पहिलो पार्टी बनाउने लक्ष्य सहज हुनेछ।”
