काठमाडौं । भारतीय क्रिकेटर विराट कोहलीले टेस्ट क्रिकेटबाट सन्न्यास लिएका छन् । उनले सन्न्यास लिने तयारी गरेको यसअघि नै समाचारहरू आएका थिए । तर भारतीय क्रिकेट कन्ट्रोल बोर्डले उनलाई इंगल्यान्ड सिरिजअघि सन्न्यास नलिन सुझाएको थियो ।
तर सोमबार कोहलीले टेस्ट क्रिकेटबाट सन्न्यास लिएको भारतीय सञ्चार माध्यमहरूले जनाएका छन् । कोहलीले अब ओडीआई भने खेल्नेछन् । कोहलीले यसअघि नै टी-२० बाट संन्यास लिएका थिए। अब उनी भारतका लागि एकदिवसीय खेलमा मात्र उपलब्ध हुनेछन्।
‘टेष्ट क्रिकेटमा मैले पहिलो पटक ब्याग्गी ब्लु जर्सी लगाएको १४ वर्ष भइसक्यो । इमानदार भएर भन्नुपर्दा, यो फर्म्याटले मलाई जहाँसम्म ल्याउँछ भन्ने मैले कहिल्यै कल्पना गरेको थिइनँ । यसले मलाई परिक्षण गर्यो, आकार दियो, र जीवनभर पाठहरू सिकायो,’ कोहलीले इन्स्टाग्राम पोस्टमा लेखेका छन् ।
‘अब म यो फर्म्याटबाट टाढा हुँदैछु, यो सजिलो थिएन । तर मलाई ठीक जस्तो लाग्छ । मैले यो खेललाई जति दिन सक्थेँ, सबै दिएको छु, र यसले मलाई मैले सोचेभन्दा धेरै दिएको छ ।’ उनले भने । कोहलीले सधैँ मुस्कानका साथ आफ्नो टेस्ट करिअरलाई फर्केर हेर्ने बताएका छन् ।
कोहलीले टेस्ट फर्म्याटमा १२३ खेलबाट ९ हजार २३० रन बनाए । जसमध्ये ३० खेलमा शतक बनाएका थिए भने ३१ खेलमा अर्धशतक बनाए । पछिल्लो समय कोहलीको टेस्ट फर्म राम्रो थिएन। २०२४-२५ मा अस्ट्रेलियामा भएको बार्डर-गावास्कर ट्रफीमा उनले पाँच टेस्टमा जम्मा १९० रन बनाए, जसमा पर्थमा एक शतक थियो। तर बाँकी चार म्याचमा उनले ८५ रन मात्र जोडे। न्यूजिल्यान्डविरुद्धको घरेलु सिरिजमा उनको प्रदर्शन निराशाजनक थियो।
