काठमाडौं : सिमोश सुनुवार निर्देशित फिल्म ‘जन्ते बाख्रो’ को तेस्रो गीत सार्वजनिक गरिएको छ। बुधबार जी ट्वान्टीवान डिजिटल युट्युब च्यानलमार्फत फिल्ममा समावेश ‘मुकु मुकु म्या’ बोलको गीत सार्वजनिक गरिएको हो। नेपाली ग्रामीण परम्परा र सांस्कृतिक चलनलाई चित्रण गरिएको गीतमा फिल्मका मुख्य पात्रहरू सौगात मल्ल, गरिमा शर्मा, आशिफ शाह, लोकेन्द्र लेखक, विशाल पहाडी लगायत फिचर्ड छन्।
कृष्ण भारद्वाजको स्वर रहेको गीतमा कृष्ण भारद्वाज र निर्भिकल्पमको शब्द र रिकेश गुरुङको संगीत छ। प्रदीप लामाको कोरियोग्राफीमा तयार भएको गीतलाई लोकेश बज्राचार्यले सम्पादन गरेका हुन्।
फिल्ममा रमेश शाह, कमल देवकोटा, रूषा न्यौपाने, रमा थपलिया, कुसुम शर्मा, स्नेहा जोशी, समापिका गौतम, कुशल गजमेर लगायतका कलाकारहरूको पनि अभिनय रहेको छ।
मुईन इन्टरटेनमेन्टको प्रस्तुतीमा तयार भएको फिल्म ‘जन्ते बाख्रो’ सामाजिक कमेडी कथावस्तुमा आधारित छ। सन्तोष गौतमको निर्माण रहेको फिल्मलाई प्रदीप भारद्वाजले लेखेका हुन्। यस फिल्ममा हरि हुमागाईंको छायांकन निर्देशन, उत्तम हुमागाईंको छायांकन, सुनिल शिवभक्तिको सम्पादन रहेको छ। यो फिल्म जेठ २३ गतेदेखि प्रदर्शनमा हुनेछ।
